Shillong, Naitung :Uwei u rangbah uba kyrteng u Bah SB Sban Khongjoh uba dei ruh u president nong ka seng nongrep Hynñiewtrep Border Area Farmers Association, Wahlakhia ula pynpaw ba u la lap ïa ki buit thymmai kumno ban rep ïa u kwai khnang ba un long u man bha.
Lyngba une u kyrwoh u Bah Sban u la ong ruh ban lait na ka bunkam ha ka thung kwai naduh ka kit ka bah bad ka trei ka kwah u la pyndonkam da ki buit kiba thymmai kaba u la shem bad pyrshang nyngkong eh naduh ka snem 2021.
Mynta u snem ruh une u rangbah u la pynpaw ba u la pyndonkam da kane ka juh ka buit ban thung kwai ha ka jaka rep kwai ka jong u ha Ri War Wahlakhiat, kata da kaba thung jylliew ïa u symboh kwai kumba thung shriew.Da kaba leh kumne u la ong ba u kwai u mih bad u man bha.
Halor kane ka bynta u Bah Sban u la ai ruh ka jingkhublei ïa ki paralok nongrep jong u na Pahamrioh, Ri Bhoi District kiba la plielad ïa u ba un shem ïa kane ka buit thymmai ban rep ïa u kwai da ka lynti kaba lait na ka jingbunkam.
