Shillong, Jylliew 4 : U Superintendent of Police (SP) ka East Khasi Hills u Bah Vivek Syiem, mynta ka sngi Balang, ula pynthikna ba ka kynhun ba ïawad briew ha Sohra, kala ïoh tam ïa kawei ka raincoat (jainjri) ba don dak bit jaboh hynrei ka dang kloi palat ban pynthikna la ka don jingïadei ne em bad ka Sonam Raghuvanshi, kaba dang jah rngai.
“Ngi la ïoh tam ïa ka raincoat kaba jhieh. Ki don ki dak khah jaboh ha ka, hynrei ngim pat lah pynthikna la kane ka dak ka dei ka snam ne kaei-tang hadien ka jingleh test ka Forensic yn sa lah ban pynthikna ïa ka” ong u Bah Vivek.
Ula ong ruh ba ki dang tohkit la kane ka raincoat ka ïasyriem ne em ïa ka raincoat ba phong ka Sonam na ki video bala ïoh. “Ngin sa ïanujor ïa ki video ba ngi don, la ka dei jong kane ka kynthei ne em bad hadien katto katne por ngin sa lah ban pynthikna. Wat ka jingheh (size) ruh ka dei 3XL” ula bynrap.
Haba ïadei bad ka jingïawad, u Bah Vivek u pyntip ba ka kynhun ka la khura ïa ki saïium baroh ha ka thaiñ Weisawdong ha ka sngi Balang. Hynrei, ka jingther u slap kala pynthut noh ïa ka jingwad. Watla ka suiñbneng ka pynthut, ka jingïa wad ka dang bteng ha ki jaka ba marjan.
“Bun ki kynhun kila ïadonbynta ha ka jingïawad-palat ïa ka 5-60 ngut ki briew na ka NDRF, SDRF, Fire & Emergency Services, SIT, SOT bad ki trai shnong kila ïadonbynta” ula ong.
Halor ka jingpyndonkam ïa ki drone, u Bah Vivek ula ong ba ka suiñbneng ka dang ailad tang ha kine ki khyndiat sngi. “Ka suiñbeng ka dang ailad tang ha kine ki khyndiat sngi hynrei ka sniew bha bad ka jingslap kaba pynjynjar bha ïa ki nongwad watla ngi la pyndonkam ïa ki drone ka NESAC” ula ong.
Ula batai ba dei lyngba ka jingïarap ki drone ba la lap ïa ka metiap jong u Raja Raghuvanshi.
Halor ka jingsaphriang ki khubor hamsaia, u Bah Vivek ula ong “Shibun kiei kiei kin mih. Ngi la thaw ïa ka SIT. Ngin ïalum ïa ki sakhi satar bad ngin wad ïa ki jingshisha baroh haba ïadei bad kane ka kam”.
Halor ka post mortem, u Bah Vivek ula ong “ïa ka post mortem la dep ban leh hynnin ka sngi hynrei ngim pat ïoh ïa ka kaiphod”.
