Ki jingshisha baroh ki dei ban paw pyrthei bad kiba donkti kin ngat ha ka aiñ: Conrad

Shillong, Jylliew 04 : U Myntri Rangbah ka jylla, Conrad K Sangma ha ka sngi Balang u la ong ba ka jingshisha ka dei ban paw pyrthei lut halor ka jingjah ki shi kurim na Indore kiba wankai sha Sohra ha kine ki khyndiat sngi ba la dep.
Da kaba phah ruh ïa ka khubor sngewlem sha ki bahaiing jong u Raja Raghuvanshi uba ïa ka met jong u la lap na ka riat ba jylliew jong ka Wei Sawdong dang shen, na ka liang u Myntri Rangbah u la ong, “Nga kwah ban ai ka jingkular sha ki bahaiing ba kum ka jylla kan pyntikna ba ki jingshisha ki dei ban paw pyrthei lut.”
Nangta u ong ruh ba kin pyrshang lut ki lad ki lynti bad ban pynjur shuh shuh ka jingwad ïa ka kurim, ka Sonam Raghuvanshi kaba dang jah rngai haduh mynta mynne.
U Myntri Rangbah u la ïai ban ba ka jingshisha kadei ban paw pyrthei lut halor kine ki jingjia baroh. “Kumta kino kino ki sienjam kiba ngi hap ban shim, ngin sa shim ïa ka rai kaba dei. Kumba long haduh mynta ka dang kloi palat ban ong kumno ka jia, katno ngi tip bad katno kaba ngim tip halor kine ki jingjia baroh namar ki don shibun kiei kiei ki bym shai wat haduh mynta katba ngi dang kren,” u la bynrap biang.
Katkum ka jingong jong u, ka dang kloi than mynta ïa u ban ong ei ei kumno ban ïaid shakhmat halor kane ka bynta, hynrei u ong pat ba lada long kumno kumno ruh kin wad beit haduh ban da lap ïa ka jingshisha.
“Bad ki briew kiba don bynta ha kane ka kam ki dei ban ngat ha kti ka aiñ,” u la ong da kaba pynpaw ba ïa mynta hi kin ap shwa ïa ka jingtohkit ba kan ïaid khnang ba ka jingshisha kan paw pyrthei lut.
U Myntri Rangbah u ong ruh ba wat ka jylla ruh ka kyndit haba jia kum kine hynrei kum ka sorkar pat ki kwah ban kular sha ki bahaiing ba kin leh lut kumba ki la dep leh baroh shi katta ban wad haduh ban da lap ïa ka jingshisha bad ba ka hok kan paw.
Haba jubab halor ka jingkylli la kane ka jingjïa kan ktah neem ïa ka jingwan ki nongjngohkai pyrthei sha ka jylla, u Myntri Rangbah u ong ba ha kum kine ki jingjia kin don beit ki briew kiban pyrshang. “Tangba kumba phi tip ka Sohra bad ka jylla hi baroh kawei la tip da baroh ba ka dei ka jaka kaba ki niewkor bad burom bha ïa ki nongwan jngohkai pyrthei. Haoid ki lah ban don ki jingjia hangne hangtai kiba rit ba ria mynshwa hynrei ym pat ju don pat kiba kum kane kaba jia mynta.”
U Myntri Rangbah u ong ruh ba kum kine ki jingjia ym dei ba ki jia tang ha Meghalaya hynrei wat ha kiwei ki bynta jong ka Ri bad wat ha kiwei ki ri ruh ki ju jia. U ong ruh ba kum kine ki jingjia ka pynlong ïa ka jylla ba kan hap ban shimkhia ban don shuh ki sienjam kiba kham pyrkhing haba ïadei bad ki jaka jngohkai pyrthei da kaba trei lang ryngkat ryngkat bad ki bor shnong bad ruh bad ki bor pynïaid ïa ki jaka jngohkai pyrthei.
Shwa kane, u Myntri Rangbah u la ong ba kum ka jylla haduh mynta ki dang sah ha ka lyngoh bad kane ka la pynkyndit wat ïa ki paidbah ka thain bad ruh khamtam ïa kito kiba pynïaid ïa ki jaka jngohkai pyrthei.
“Ka dei ka jingjia ba sngewsih, kaba ngim pat ju ïohi ha Meghalaya ba kin jia kiba kum kine ki jingjia haduh ba ka la pynkyndit bad pynlyngoh lut ïa baroh. Wat ki paidbah na katei ka thain ki la kyndit lut, ki nongpynïaid ïa ki jaka jngohkai pyrthei ruh ki sah lyngoh lut. Kadei kaei kaei kaba ngi khlem poi pyrkhat satia ba kin jïa kiba kum kine ki jingjia,” u la ong.
Lah ban kdew hangne ba ïa ka met jong u Raja Raghuvanshi la lap ha ka 02tarik mynta u bnai hadien ka jingwad kaba khlem shongthait ha kylleng ki jaka jngohkai pyrthei kiba don ha katei ka thain, kata ruh hapdeng u lapbah uba jur, katba ka jingwad ïa ka kurim jong u pat ka dang ïaid haduh mynta.