Nongpoh, Naiwieng 28: Ka Public Accounts Committee jong ka Meghalaya Legislative Assembly hapoh ka jingïalam u Bah Charles Pyngrope kum u Chairman mynta ka sngi kila hiar jurip ïaka Modern & Hygienic Fish Market kaba don haka shnong Saiden ha Ri-Bhoi District hadien ba katei ka Iew dohkha kaba la shna haka rukom kaba janai ryngkat ki jaka buh ïaki dohkha kiba biang, kaba haduh mynta ka sorkar kam shym la lah ban pyntreikam satia ïa katei ka ïew ban kyntiew ïaki dohkha kiba pynmih hi naka jylla.
Ha katei ka jingjurip la sakhi ruh da ka jingdonlang ki dkhot jong katei ka Committee ba dei ruh ki MLA naduh u Bah Lakmen Rymbui, Bah Gavin Mylliemngap, Bah Ardent Miller Basaiawmoit, Rupert Momin, u A Baranwal Deputy Commissioner ka Ri-Bhoi, VS Rathore Superintendent of Police, ka kong M Khongjliew Superintendent of Fisheries, ki ophisar naka district, ki nongïalam shnong ka shnong Saiden bad kiwei kiwei.
Lah ruh ban kdew hangne ba ka Ri-Bhoi District ka dei kaba donbok tam kaba la ioh ïakatei ka ‘Modern and Hygienic Fish Market’ kaba la dep ban plie paidbah ha u snem 2018 bala tei katkum ka juk stad ba mynta haka shnong Saiden haka jinglut kaba la poi sha ka 1.6 Klur tyngka bala bei tyngka da ka National Fisheries Development Board jong ka sorkar India ryngkat bad ka sorkar jylla lyngba ka Aquaculture Mission kaba dei ka iew bala mang kyrpang ban die tang ïaki dohkha kiba pynmih hi napoh ka jylla kaba long ka jingkyrkhu ïaki paid nongrep dohkha bad kumjuh ruh ki nongbam ba kim donkam shuh ban shanñiah haki dohkha ba wan nabar jylla, hynrei kaei kaba ngi iohi mynta ka long ba katei ka iew wat hadien bala dep ban plie naduh u snem 2018 kala shu sah khongreng bad ka sorkar kam shym la lah satia ban pyntreikam ïaka bad ban pyndep ïaka thong kumba angnud.
Hadien katei ka jingjurip naka liang katei ka committee kala lum ruh ka jingïalang ïaki heh ophisar jong ka district ha Conference Hall jong u Deputy Commissioner ka Ri-Bhoi ban ïakren sani halor ka jingpyntreikam ïaki skhim bad ki kam pynroi ha Ri-Bhoi kiba kynthup ïaka rep ka riang, ka koit ka khiah, ka pule puthi bad kiwei kiwei.
Haba pyrshang ban wad jingtip halor katei ka jingjurip naka liang u Chairman bad ki dkhot katei ka Committee kila kyntaid ban kren bad ki lad pathai khubor bad pyntip ba ïaka kaiphod na katei ka jingjurip yn sa rah sha ka sorkar.
