Shillong, Naiwieng, 28: Ha ka jingïaid lynti kaba 33 snem ban pynïaid ïa ka ing basa hapoh ka nongbah Shillong bad shabar ka jylla, ka Hotel Polo Towers Shillong ka la shna sa ïa ka jaka bam bad ka Cocktail Bar kiba plie baroh shi sngi kaba la ai kyrteng “Tring Tring”.
Ïa ka Tring Tring yn sa plie paidbah ha ka sngi Thohdieng.
Kaba pynsngewtynnat ïa ki nongbam ka dei kaba la wanrah biang ïa ka jingsngew jong ki por sha ki snem 1990 bad ka jingpynïahap dur bad kane ka juk ba mynta.
Ka “Tring Tring” ka heh haduh 3,200 square feet ïa kaba la saiñ dur bha bad la pynlong ïa kane ka jaka kum kawei na ki jaka ban khring ïa ki nongshong shnong ka jylla, nabar ka jylla bad nabar ri. La ka long ban leit bam sngewtynnad ha ka por janmiet ha ka Bar, ban don ki jingkhawai sngewbha, ban bamja miet hapdeng ka jingjaijai na ka jingsawa ki sur jingrwai.
U CEO bad Director of Hotel Polo Towers Group u Deval Tibrewalla, ha ka jingïakren bad ki lad pathai khubor u la ïathuh ba la sdang ïa kane ka Hotel da u kpa jong u, bad mynta u la shimti pateng ban pynïaid ïa kane ka hotel bad ban pynwandur katkum ka jingïaid jong ka por.
Ha Tring Tring la buh kyrpang ruh ïa ka Television kaba la rim bha bad ïa ki telephone ba la rim ba ki paidbah ki ju pyndonkam bha ha ki snem kiba mynshwa ïa kiba ki khynnah ha kane ka juk pyndonkam mobile phone kim da kham ïohi shuh.
Ki jingbam jingdih ha ka Menu jong ka “Tring Tring” ka long kaba la khleh lang ki jingbam tynrai bad kiba nabar ri ruh kumjuh, kaba don ha ka ïa ki jingshet ba la shet na kiba lah ban ïoh katkum ka aiom.
Ka don ruh ïa ka Cocktail Menu kaba la kham kyrpang, ïa kaba la khleh da ki nongkhleh ba tbit bad don ïa ka Cocktail ba kyrpang kata ka Taste of Shillong, Leaves & Bud, Butterfly Effect, 0364, Data Roaming, The Landline, bad Trunk Call. Ïa kine ki jingdih lah ban dih ryngkat ki jingbam kiba bang kum ka Crispy Goat Cheese Salad, Mushroom Cappuccino, Pistachio Basil Pasta, Tomato & Asparagus Risotto, bad Grilled Fish kaba don bad ka Caper Butter Sauce.
Haba kylli, u Tibrewalla u la ïathuh ba u dang don ka thong ban pynïar ïa ka jingshakri jong u sha ki bynta bapher bapher jong ka thaiñ Shatei Lammihngi bad shabar ka ri India.
U la ïathuh ba ha ka “Tring Tring” yn pynlong ruh ïa ki jingïatem ïaput, kin don ki miet ba pynbyrngia ïa ki nongwan bam bad kiwei kiwei jingpynbyrngia ha ka tem ka put namarba ka nongbah Shillong ka dei kaba paw bha ha ka tem ka pur.
Naduh ki retro beat haduh ki rukom tem kiba jaijai da ki nongtem kiba na kane ka shnong, manla ki por ba ki wan rung kan long kaba sah kynmaw.
