Da ka jingïohkhwai ka NPP ïa ki sanngut ki MLA kata 2 ngut na ka PDF bad 3 ngut na ka Congress (INC) bud sa ka jinglah ban knieh noh ïa ka Gambegre Assembly Constituency na ka Congress party ha ka bye election kaba long ha ka 13 tarik Naiwieng dangshen, ka NPP ka la kynjoh pura sha ka 32 ngut ka jingdonbriew ha ka Ïingdorbar kaba 60 ngut. Kum ka jingpynkynmaw, ka PDF ka ïasoh noh bad ka NPP da kaba pyndam syndon ïa ka party lajong, dei hadien ka jingkop sarong jong u MLA jong ka Mawkynrew ha ka por election ba ka NPP ka la tyrwa ïa u haduh 5 Klur tyngka bad um treh, kumjuh ruh u Dr (Bom) Celestine Lyngdoh MLA Umsning ryngkat bad ki arngut kiwei pat ki MLA Congress ki la leit pynïasoh NPP dei hadien ba u la syllad jem ïa ka NPP ba ka dei ka party jong ki High Level namar u ong hapoh ka House, ba la don sa kawei pat ka Tribe ha Meghalaya bad kata ka dei ka High Level Tribe. Da ka jingjop Gambegre Assembly Constituency, don katto katne ngut ki briew na katei ka party kiba la kop sarong ba dei tang ka party NPP hadien jong ka APHLC kaba lah ban kot sha katei ka thong.
Hynrei katei ka jingïanujor bad ka party APHLC ka dei tang ka jingsarong kopia ka bym shongnia haei haei ruh, namar ka APHLC da kawei ka sur kmen jong ka jingïoh Hill State, ki paidbah ki ai ïa ka clear mandate jong ki haduh 32 ngut khlem da don ki kam shutia na sha lyndet, ka jingthep vote ruh ka dangdei beit da ki Secret Ballot kaba ym lah ban leh thok kumba suba ïa ki EVM machine mynta, katba ka NPP pat de ka poi sha katei ka thong kumba la kdew haneng dei tang ki buit sianti kiba kumno re na sha lyndet, kiba lah ban long ha ka dur jong ka Ïew khaïi kulai (horse trading), ne ka ïew shuki kyllan khleiñ ne ki jingpynbieit ha ka kyrteng jong ka roi ka par (development). Tangba, lada ngi bishar bniah ka jingjop jong ka NPP kaba bun hi dei tang na rilum Achik katba nangne na Khasi-Jaiñtia pat ki briew kim da pdiang ïa ka. Hynrei ym lah pat ban len, ba ïa ka History jong ka Meghalaya la thoh, ba ki tnga jong ki ar Chief Minister kiba jop MLA tang na Garo Hills. Na ki 36 seat jong kane ka Ri jong ngi ym pat don. U Dr. Mukul Sangma u thaw record da kaba u pynjop syndon haduh 4 ngut na ki bahaïing hasem jong u, kata ka tnga lajong ka Dikanchi D Shira, Miani D Shira ka khun bad Zenith Sangma u para, katba u Conrad Kongkal Sangma pat, watla u wan na ka longïing ba khrawbor jong ka saiñhima, u lah ban pynjop tang ïa ka tnga lajong hi ka Dr Mehtab Chandee, namar ka Agatha & u James ki la kylla lyndang ha ki election bapher bapher. Tangba, la ka long kumno kumno ruh, ki Garo te ki lah ban pynkohnguh ïa ki paidbah jong ki ban jied wat ïa ki kurim jong ki ruh. Ha ngi hangne, te ka dangeh than ban poi sha katei ka thong, namar ba ki dangkheiñ sang hi ruh imat ïa kata ka dynasty politics. Ïa ka jingbha bad jingsniew jong kata ka Dynasty Politics nga ieh ha ka jingstad jong ki paidbah ban bishar, tangba ha India te ka sdang shwa na ka longiing longsem jong ka Gandhi.
Ka jingkren jong u Bah Prestone Tynsong u heh jong katei ka party hadien ba la jop ïa ka Bye Election dang shen, u ong ba ka NPP kan ym leh beiñ ïa ki paralok ba iatreilang, kata: ka UDP, BJP bad HSPDP kin ïaisah hi watla ki hap ban sdien na Tnum Bus ruh ym lei lei. Ka jingkylli mynta ka long haba phi la ïoh absolute majority, hato ka lah neem ban pynurlong ïa ki mat ba ka la pruid dak ha ka manifesto jong ki. Ka election MDC ban wan ngin sa ïohi byrngut byrnget aiu u paidbah u don ban jubab, ban aiksai wat ia ka Election 2028 ruh. Ki samla wadkam ki la nangkiew katba nangïaid ki sngi, namar la bun bun snem ym ju don thikna shuh kata ka thungkam regular lait noh da ki kam casual ne contractual kiba u Dr. Mukul Sangma u la ther tyngeh hapoh ka House. Ki samla, ki lynga bad pisa jingmut ha surok bad ki poi sha ki kam sniew bad ngop ha ki drugs bad kiwei pat ki kam thala. Hato ka sorkar ba skhem paid katne kam ïohi ba kane ka dei ka challenge? Kano kano ka jingeh, naduh ka jinghiar jong ka ïoh ka kot (economy), ka jingbun ka jingri khunrei (single mother), ki kam lute, ki kam pynïap briew, ki kam leh be-ijot yn nym lah ban weng lymda ka sorkar hi ka tih naduh tynrai ban lap ïa ka daw. Shu tem tang nalor lyngba ka Force ka dei tang ka jingpynsyrwa kai ïa ka por bad ka bor (resource). Ka jingkhapngiah ki surok ha ka nongbah Shillong bad kiwei pat ki nongbah jong ki District ki kylla long tang ka jingïatim ïania para nongñiah kali, namar kat shaba ïaid tang ka dheng kali suda, ym don ba pyntreikam da kiwei pat ki lad, kata sha Assam pat lada phi jah tang hynriew bnai phin bakla lynti,namar ki development ba laiphew jait ki tuid.
U Bah Paul Lyngdoh ha ki snem ba mynshwa u la kren skhem bha ban tei noh ïa ka Flyover na Rap’s Mansion shaduh petrol pump Anjalee bad sha wei, hynrei haduh mynta, kata ka jingthmu kam pat lah ban ïohi ïa ka jingshai jong ka sngi, ban pynsuk ïa ki paidbah. Ki heh ki haiñ bad ki bahaïing hasem jong ki, ki ïaid pynheh shadem namar ba don pilot car nakhmat bad nadien ban synran, tad haduh ba jia ki jingïap ba khlem dei por jong ki paidbah namar kum kitei ki kali synran ïa kiba heh. Nangta, ki kam bylla contractor, bunsien la shu khot da ki sopsop tender (closed tender) ym da ki open tender khnang ba ki briew jong ki baheh bad kiba khrawbor kin trei hi naduh ki Building haduh ki surok (roads). Ka jingud jingnam jong ki contractor barit ha kine ki khyndiat snem ka long namar ba ym ïoh kam, wat ki bill rim ba sahkut ruh ym ïoh shuh, ki hap ban withdraw wat ïa ka registration jong ki namar ba kim lah shuh ban compete bad kiba donbor. Kumta, ka noh shiliang ka tarajur jong ka sorkar ha ka ïoh ka kot, kiba riewspah ki nangkiewskong katba ki baduk pat nangduk tasam.
Ki nonghikai kiba la hikai da ki phewsnem, la shu behkam kumba beh ïa u ksew, ki shah jingit ha ki madan bad ha ki surok ban dawa ïa ka hok lajong namar ki khun ki kti jong ki, hynrei la ñiewbeiñ bad ym don ba patiaw ïa ki. Pynban la kyrjaw mluh shuh shuh ïa ka jingmong mynsiem jong ki da kaba byrngem ban pynngat kyndon aiñ lada kim weng jingïakhih, ym tang katta, la sloit kam noh ïa ki shisyndon. Balei hap ban da pass ïa kita ki MTET ne Dl. Ed bad kiwei ïa ki nonghikai kiba la hikai da ki phew snem. Balei ym shu regularised beit ïa ki? Haba phai pat sha ka Boundary issue, hadien ba kyllon ïap lai ngut ki riew rangbah ha Mukroh, West Jaiñtia Hills ha u November 2022 ha kita ki Assam Forest Protection Force bad arngut pat ha Langpih, haduh mynta ym pat lah ban pynbeit ïa u pud u sam bathikna, la shu thok shu shukor ïa ki khynnah skul ba pule geography ba u pud u sam ka Jylla u dei nangta shaduh shata, phewse ka dei tang ka jingshukor.
Ngi khmih lynti, mynta sa tang lai snem ïa kane ka sorkar ba la lamkhmat da ka NPP kaba don absolute majority ba kan pyni ïa ki kam rangbah jong ka, ym ban roi tang ha sor ne tang ha ki file kumba jia ïa kata ka Smart City Project ka bym i seisoh seisla eiei ruh em haduh mynta, katba ka jingpyllut pat da ki phew klur.
Ka jingeh jong ki samla pule ha NEHU bad ka jinghiar kyrdan jong katei ka skulbah kat haduh ba thoh ïa kane ka jingthoh, ka sorkar Majority kam pat lah ban leh eiei, namar ba shu rahkti beit imat katba tyrwa ka sorkar kmie na Delhi. Dei namarkata ka daw, ym lah ban pynkohnguh ïa u Prime Minister Narendra Modi ban ai ïa ka jingdawa Inner Line Permit (ILP), watla ki kloi ban tur shane ha ki por election ban pynbieit paidbah.
Khatduh eh, ka NPP ka sorkar majority ka dei ban pynshisha ïalade ba ka pher na kiwei pat ki sorkar ba mynshwa, lym kumta ki kam pynroi ri kin ïaid hi shi kam shakhmat bad arkam shadien.
