Lap bilor pait na ka dawai ba ïoh na Nongpoh Civil Hospital, ujor ka KSU sha ka DMHO

Nongpoh, Nailur, 27: Kawei ka longkmie kaba leit shim dawai khyllung na Civil Hospital Nongpoh ka la lap pynban da ki bilor pait bad ki phngit bilor hakawei ka dawai um (Acklogal-P) haka por ba ka mut pyndih ïa i khyllung hadien ba ka la leit shim dawai na katei ka jaka sumar jong ka sorkar kaba lah ruh ban buh ka jingma kaba khraw ïa ka jingim briew khamtam ïa ki khyllung.
La ïoh jingtip ruh ba ka kmie jong itei i khyllung ka la leit ban shim dawai na Nongpoh Civil Hospital haka 25 tarik mynta u bnai hynrei hadien ba ki doctor kila bthah ïa ka ban thied ïa katei ka dawai ka la pyndih ïala I jong I khun hynrei dei hadien ka jingpeit bha ka la ïohi pynban ba don ki kynja ba lang bad theh ha madan ha kaba la lap pynban da ki bilor pait bad ki phngit bilor barit barit kiba lah ban buh jingma shisha ïa ka jingim briew.
Halor katei ka jinglap bilor pait ha katei ka dawai na ka liang ka KSU Nongpoh Circle ha ka jingïalam u Samla John Lyngdoh President, Baiashanlang Kharshanlor General Secretary mynta ka sngi ka la leit ban ujor syndon sha ka DMHO ka Ri-Bhoi District halor katei ka jinglap ïa ki bilor pait ha katei ka dawai um ba katei ka jingdon ki bilor pait ka long ka jingma kaba khraw ïa ki paidbah khamtam ki khyllung lada la kum nguid lang.
Haba kren sha ki lad pathai khubor na ka liang u Samla Baïashanlang Kharshanlor u la ong ban na ka liang ka seng ka la leit ban ïakynduh ïa ka DMHO hadien ka jingujor na kawei ka longkmie kaba la lap ïa ki bilor pait hadien ba ka la dep pyndih ïa i khyllung ha kaba na ka liang ka seng ka la dawa mardor ban pynsangeh shuwa ban ai sha ki paidbah bad ban pynlong shuwa ka jingtohkit, namar bunsien ki hospital sorkar ka ju ai da ki dawai kiba tad dor kiba lah ban buh jingma ïa ki paidbah.
U la ong ruh ba kum ka seng kam kynnoh ïa ka Civil Hospital hynrei ba kidei ban tip ban shimkhia ban tip namar ba ki dawai hi bunsien kiba la ai sha ki paidbah ki dei kiba tad dor bala shu wanrah da ki supplier ban sam pat sha ki paidbah ba kum kane ka jingjia ka dei kaba pynkyndit bynriew namar wat ki rangbah ruh kilah ban shitom jur lada kum nguid ïa kitei ki phngit bilor.
Na ka liang ka DMHO ka la kular ban pynsangeh shuwa shipor ïa ka jingai ïa katei ka jait dawai ha Ri Bhoi bad ban pynlong ka jingtohkit ba bñiah halor katei ka jinglap bilor paid na katei ka dawai.