Lahduh ka Umpling Presbyterian SS ha ka Inter School Sports Meet 2023 jong ka Laitumkhrah District

Shillong, Ïaïong 23 : Ka Umpling Presbyterian Secondary School ka la ïoh rah kum ka lahduh (Over all Champion) ha ka lympung ïalehkai 4th Inter School Sports Meet 2023 ba la pynïaid da ka Education Committee jong ka Laitumkhrah District.
Ïa katei ka lympung jingpynïalehkai kaba la pynlong ha ki ar sngi kaba la sdang ha ka 20 tarik la pynkut noh ha ka 21 tarik Ïaïong 2023 ha kaba u Bah Charles Pyngrope MLA ka Nongthymmai Constituency u la pynhap noh ïa ka pyrda jong katei ka lympung kum u Kongsan ha ka jingsakhi lang ki nongkitkam jong ka Education Committee jong ka Laitumkhrah District, kaba la pynlong ha madan ïalehkai jong ka Divine Saviour, Nongshilliang.
Katba ka skul kaba wan ba ar ha katei ka Inter School Sports Meet 2023 la ïoh rah da ka Nongmynsong Presbyterian Secondary School. Ka skul kaba la ïoh rah jingjop ha ka March Past ha ka liang ki shynrang la ïoh rah da ka Umpling Presbyterian Secondary School bad ka Nongmynsong Presbyterian Secondary School ha ka liang ki kynthei.
Kiba jop kyrdan ba ar ha ka liang ki shynrang kadei ka Laitumkhrah Presbyterian Higher Secondary School bad ha ka liang ki kynthei kadei ka Umpling Presbyterian Secondary School.
Ïa ka nam Best Athlete jong ka kyrdan ïalehkai U-19 ha ka liang ki shynrang la ïoh rah da u Ïaineh Nongsiej bad ka Monisha Basaiawmoit, baroh ki arngut kidei jong ka Nongmynsong Presbyterian Secondary School. Ha ka kyrdan U-14 ïa ka nam Best Athlete ha ka liang ki shynrang la ïoh rah da u Ïengskhem Diengdoh bad ka Meshan Kharnaior ha ka liang ki kynthei bad baroh arngut kidei jong ka Umpling Presbyterian Secondary School.
U George R Syiemïong u la ïoh rah ïa ka nam Best Athlete ha ka kyrdan ïalehkai jong ki U-16 uba dei jong ka Umpling Presbyterian Secondary School bad ka Lariphylla Nongrum jong ka MPSS ka la jop ïa ka nam Best Athlete ha ka liang ki kynthei.