Jowai, K’Lyngkot 27 : Ka kynhun ïalehkai jong ka Sabah Muswang SC kala long syndon ka lahduh haka lyngpung ïalehkai ‘Republic Day Cup’ Under-13 Football League Tournament Final 2023, ba la pynïaid da ka West Jaiñtia District Sports Association, Jowai ha ryngkat ka jingïatreilang bad ki bor pynïaid District ka WJH ha madan Kiang Nangbah Stadium Ladthadlaboh Dongmihsngi.
Na ka liang ka Sabah Muswang SC kala jop lyngba ka jingïashut Tie breaker da 2-1 kol ïa ka Demthring SC. Haba phai sha ka jingïakhun naduh ba sdang ka long kaba ïakhiad bha namar haduh ba kut jong ka por jingïakhun kila neh da mar shikol 1-1.
Ïa ka shikol na ka Sabah Muswang SC la thep da u Mar oo P Shylla haka minit ba 8 min, katba na ka liang ka Demthring kala ïoh ban pynphai kylla ïa ka shikol lyngba u Given Son Suting haka minit ba 27.
Ha kane ka lympung ïa ka nam Man of the Match la ïoh da u Riskhemki Bang ka Sabah Muswang SC, Top Scorer la ïoh da u Given Son Suting uba la thep haduh 11 kol na ka Demthring, Best Goalkeeper da u Samkor Ryngkhlem ka Demthring SC, katba ïa ka nam Player of the Tournament la ïoh da u Given Son Suting na ka Demthring SC.
Ka kynhun kaba ïoh rah ïa ka nam lahduh ha kane ka sngi ïakhun phainal kala ïoh rong ïa ka song pisa kaba 20,000 hajar tyngka, katba ka kynhun ba wan ka ar ka long 10,000 hajar tyngka lem bad ki Trophy.
