Shillong, Jylliew 18 : Ka Randajied United Football Club (RUFC) ka la ïoh rah ïa ka nam lahduh jong ka Meghalaya State League 2023 hadien ba ka la pynliem noh ïa ka Khliehmawlieh Youth Club da 1-0 ha ka jingïalehkai phainal kaba la long ha ka sngi Saitjaiñ ha madan First Ground jong ka SSA ha Polo.
Ka jingïakhun phainal hapdeng kine ki ar tylli ki kynhun ka long kaba itynnad bad mar ïakhaid bha ha kaba ki rangïalehkai jong baroh ar ki kynhun, ki la sei lut ïa la ki sap ki phong ban ïakhun dohïap ban ïoh rah ïa ka nam lahduh jong ka Meghalaya State League (MSL). Ka jingïalehkai ka la nang shongshit shuh shuh na ka jingwan ai jingkyrshan jong ki paidbah, kynthup naduh ki longkmie longkpa, ki samla shynrang bad kynthei haduh ki hep kiba rit kiba la wan poi na kylleng ki bynta jong ka .
Ha kane ka jingïalehkai, u Wanlamsuk Nongkhlaw jong ka RUFC ula ïoh ban thep ïa ka kol ha ka jingïalehkai kaba dang ïaid 9 minit jong ka kylla step bad lyngba katei ka shi kol, ka Rangdajied United FC ka la ïoh khur syndon ïa ka jingjop.
Ha kane ka jingïakhun phainal, la wan sakhi lang ruh u Bah Sniawbhalang Dhar uba dei u Symbud Myntri Rangbah ka Jylla, u Bah Hamletson Dohling uba dei u nongai buit jong u Myntri Rangbah ka Jylla, u Additional Chief Secretary u Dr P Shakil Ahammed, ka Deputy Commissioner ka East Khasi Hills Kong RM Kurbah, ka Secretary ka tnad Sports and Youth Affairs Kong R Sohkhlet, u MLA barim bad u nongïalehkai barim jong ka India u Bah Eugeneson Lyngdoh, ki nongïalam ka Meghalaya Football Association bad kiwei kiwei.
Ka jingïalehkai ka long kaba iynnad bha ha kaba ka Khliehmawlieh watla ka la shah thep shi kol mar syn dang ka jingïalehkai, hynrei kam shym la duh jingkyrmen hynrei ka la ïakhun dohïap bad ka la ïoh ruh ki katto katne ki kabu hynrei kam shym la la lah ban thep kol namar ka jingskhem ki rang ïalehkai shadien jong ka Rangdajied United kiba la ïalehkai bha khlem da ailad ïa ki rangïalehkai ka Khliehmawlieh ban ïoh thep kol.
Ha kaba kut la sam ïa ki khusnam ba kynthup ka trophy nam lahduh bad ka song pisa ha kaba ka Rangdajied United FC kaba ïoh rah nam lahduh ka ïoh ïa ka cheque ba T.5 Lak katba ka Khliehmawlieh YC ka ïoh T.3 Lak. Ha kane ka tournament ki Club kiba la ïoh rung ban ïakhun ïa ka MSL ki la ïoh pdiang mar T.1 lak bad kiba ïoh rung sha ka semi phainal ki ïoh mar T. 1 Lak.
U Donlad Diengdoh jong ka Mawlai SC u la ïoh ïa ka khusnam Golden Boot da kaba thep 15 kol, arngut ki rangïalehkai ka Rangdajied kiba kynthup ïa u Banshanlang Sten u la ïoh ïa ka Golden Glove kum u nongap kol ba tbit tam bad u Tremiki Lamurong u la ïoh ïa ka khusnam Golden Ball ne u nongïalehkai uba kynsai tam ha ka MSL.
U Bah Sniawbhalang Dhar ula aiti ia ki khusnam jongka MSL ha ka RUFC kaba la long ka lahduh ha ka lympung ialehkai Football.
Ha kaba kut jong ka kylla step, la sam ïa ka ‘Cheque’ kaba T.2 Lak sha ki Association kiba pynïasoh bad ka MFA ha kaban pynlong ïa ka jingïalehkai phutbol ha ki thaiñ jong ki bad kane kadei kum shi bynta jong ka jingshimkhia ka MFA bad ka sorkar jylla ban pynbiang ïa ki jaka ïalehkai ha baroh ki district jong ka jylla.
