Lahduh ka ONYX bad ka Shillong Labet ha ka Independence Cup Open Basketball Tournament
Khur u Jason Bakai bad ka Iairy Sangma ïa ka khusnam MVP.
Shillong, Nailar 16: Ka East Khasi Hills District Basketball Association hynnin ka Sngi Hat Majai ka la ïoh ban pynhap pyrda noh ïa ka 2nd Independence Cup Open Basketball Tournament 2023 ha kaba ïa ka namlahduh la rah da ka ONYX ha ka thup jong ki shynrang, katba ka Shillong Labet ki la jop ha ka thup jong ki kynthei.
Kumban shu pynkynmaw, kane ka dei ka sien kaba ar ba la ïoh ban pynlong ïa kane ka lympung bad la plie pyrda ïa ka naduh ka 29 tarik, Naitung bad la pynhap pyrda noh ïa ka hynnin ka 15 tarik kum shi bynta ka jingrakhe ïa ka sngi laitluid jong ka ri.
Ha kane ka sngi, la ïadon ryngkatlang bad i Kong Isawanda Laloo (IAS Director, Department o Sports & Youth Affair) i ba long kum i kongsan ha kane ka sngi pynkut ryngkat bad i Bah Samborlang Diengdoh (Sport Promoter) kum u symbud kongsan, lem bad kiwei ruh kiba kynthup ïa u Bah Kitkuparlang Kharshiing, Rangbah Shnong jong ka Mawlai Nongpdeng, u Bah Lam Marbaniang, Secretary Shnong Mawlai Nongpdeng, u Bah Joel Marbaniang President Meghalaya Basketball Association, i Kong Yalinda Jyrwa, Vice-President Meghalaya Basketball Association, u Bah Wanlambok Iawphniaw, Joint Secretary Meghalaya Basketball Association.
ïa kane ka final la ïoh ban sdang ha ka por 1 baje ka nohphaisngi ha Mawlai Nongpdeng Basketball Court, bad ka jingïakhun final kaba nyngkong ka la long hapdeng ki kynthei, ha kaba ka Shillong Labet ka ïakhun pyrshah ïa ka DUBAKH.
Ka jingïakhun hapdeng kine ki ar kynhun ka la long kaba ïakhaid bad baroh arliang ki la ïoh ban thep mar ïabud hynrei dei ki thei ka Shillong Labet kiba la ïoh ban thep palat, ha kaba ki la jop da 49 – 45 poiñ ban rah ïa ka namlahduh.
Haba phai pat sha ka thup lehkai jong ki shynrang, ki rangïalehkai jong ka ONYX ki la pynliem noh ïa ka SYM (Salescian Youth Movement) da 76- 70 poiñ ban rah ïa ka burom kum ki lahduh.
Shuh shuh, ha baroh ar ki jingïakhun final la ïoh ban sam ïa ka khusnam Most Valuable player, ha kaba na ka liang ki kynthei la khur da ka Iairy S. Sangma katba napdeng ki shynrang la khur da u Jason Bakai.