Shillong, Ïaiong 01 : Ka kynhun ïalehkai jong ka MLP ka la ïoh ban rah ïa ka nam lahduh ha ka lympung ïalehkai ki ophis ba la tip kum ka Shillong Cricket League inter-office 2024-2025 hadien ba ka la pynliem ïa ka kynhun ïalehkai jong ka Raj Bhavan da 13 ron.
Haba phai sha ka jingïakhun ha kane ka sngi, ka Raj Bhavan hadien ba kala jop ïa ka jingkynting pisa ka la jied ban kawang nyngkong. Kumta ka MLP haba ïoh ban tied nyngkong ka la lah ban kamai 129 ron bad hap san wiket ha ki 20 over.
Ki rangtied ba kamai bun ron bha ki kynthup ïa u Ganesh Sahani ba kamai 31 ron ha ki 24 bol bad u Kamal Thapa ba kamai 24 ron ha ki 16 bol.
Na ka liang ki rangkawang bol pat, u Robin Chatteri u la ïoh ban khur ar wiket ha ki saw over bad ai kamai pat 20 ron.
Haba la poi pat ka pali jong ka Raj Bhavan ban beh ïa ka thong, kane ka kynhun ka la ïoh ban kamai tang 116 ron bad hap lut ki wiket ha ki 19.1 over.
Ki nongtied ba kham kamai bun ki kynthup ïa u Sunil uba la lah ban kamai haduh 31 ron ha ki 22 bol bad u Bijit Yadav uba kamai 28 ron ha ki 37 bol.
Na ki rangkawang bol pat u Pankay Roy u la ïoh ban khur saw wiket bad ai kamai 23 ron ha ki saw over katba u Ganesh Sahani pat u la ïoh ban khur lai wiket bad ai kamai 19 ron ha ki 3.1 over.
Ïa ka khusnam rangïalehkai ba kynsai ha kane ka sngi la ïoh da u Ganesh Sahani uba ïoh ban tied 31 ron bad khur lai wiket.
