Mawkyrwat, Risaw, 22: Ka Jingïaseng Kynthei Mawkyrwat Presbytery Higher Secondary School, Mawkyrwat (JKMPHSSM) jong ki shynrang bad ka St. Mary’s Higher Secondary School, Rangblang jong ki kynthei ki la long ki ar tylli ki kynhun kiba la rah ïa ka nam lahduh ha ka 1st Inter School Basketball Tournament 2023 hapoh madan jong ka Nativity Higher Secondary School, Mawkyrwat.
Lah ban kdew ba ïa kane ka lympyng ïalehkai basketball la pynïaid da ka Basketball Hounds Club, Mawkyrwat (BHCM), South West Khasi Hills District da ka jingthmu ban kyntiew ïa ka kam ïalehkai basketball hapdeng ki khynnah skul kiba don hapoh jong ka Mawkyrwat C&RD Block bad kumjuh ruh ban pynrung ha ki ïa ka mynsiem jong ka jingïatylli, jingïalong kawei bad jingtrei shitom namar da kine lah ban pynpoi sha ka thong jong ka jingjop la ha kano kano ka jingïaleh.
Ha ka 21 tarik mynta u bnai ka la poi haba kut jong ka jing ialehkai ban pynhap pyrda noh ia ka Inter School Basketball Competition 2023 kaba kila pynlong ha Madan Basketball Court jong ka Nativity Higher Secondary School Mawkyrwat ha kaba u bah Malvernstone Marngar u la long kum u kongsan.
Haba phai ha ka jingïalehkai phainal ha kane ka sngi ka la long da shisha kaba itynnad na ka jingtbit ki ‘thei bad ki ‘rang ïalehkai ha baroh ki saw tylli ki skul bad kaba la pynhun shisha ïa ki nongwan peitkai. Ha ka liang ki khynnah shynrang, ka Jingiaseng Kynthei Mawkyrwat Presbytery Higher Secondary School, Mawkyrwat ka la ïoh haduh 53 la 32 poiñ pyrshah ïa ka Nativity Higher Secondary School, Mawkyrwat.
Nangta, ha ka liang jong ki khynnah kynthei pat ka St. Mary’s Higher Secondary School, Rangblang ka la ïoh 18 la 6 poiñ pyrshah ïa ka JNV Mawkyrwat, South West Khasi Hills District.
U kongsan uba la wan khang ïa kane ka 1st Inter School Basketball Tournament 2023 u dei u bah Malvernstone Marngar ryngkat ka jingïadonlang u President jong ka Basketball Hounds Club, Mawkyrwat (BHCM), u bah Freddy Marweiñ bad u Wanskhemlang Lyngkhoi kum u Secretary, ki Nonghikai, ki khynnah skul ha ryngkat bad kiwei de ki ‘riew rangbah jong ka thaiñ.
