Mawkyrwat, Naitung 31: Ka Balang Mawlangwir Higher Secondary School, Mawlangwir ka la long ka lahduh ha ka lympung Ïalehkai badminton kaba la tip kum ka 6th South West Khasi Hills District Inter-School Badminton Championship 2025 ba la pynïaid da ka South West Khasi Hills District Badminton Association ba la pynlong hapoh ka Mawlangwir Indoor Stadium, South West Khasi Hills District.
Ki nongjop na ki skul ha kane ka lympung ïalehkai jong ka 6th South West Khasi Hills District Inter-School Badminton Championship 2025 ki long ka Mawlangwir Higher Secondary School, Mawlangwir kaba la ïoh khur haduh 4 tylli ki takma ksiar bad 5 tylli ki takma rupa katba ka Christian Principles Academy, Mawkyrwat bad ka Little Star Higher Secondary Shool, Mawkyrwat ki la ïa khaid ha kaba ki la ïoh khur mar 3 tylli ki takma ksiar bad 2 tylli ki takma rupa.
Haba phai pat ha ka jingjop ha ki kyrdan ba la phiah ki long ha ka kyrdan ba 12 snem shapoh (single) jong ki khynnah shynrang dei u Tyngshaiñlang Iawphniaw bad ka Idapynkmen Marpna jong ki kynthei, ha ka kyrdan ba 14 snem shapoh (single) dei ka Alvatudor Marweiñ jong ki kynthei kynthei bad u Gedion Stiffinal Wanniang jong ki khynnah shynrang, ha ka kyrdan ba 14 snem shapoh (doubles) dei ka Alvatudor Marweiñ bad ka Anniegrace Wanniang.
Ha ka kyrdan ba 16 snem shapoh jong ki kynthei (single) dei ka Alvatudor Marweiñ jong ki khynnah kynthei bad u Mebankyrshan Iawphniaw jong ki khynnah shynrang, ha ka kyrdan ba 16 snem shapoh jong ki shynrang (single) dei u Mebankyrshan Iawphniaw, ha ka kyrdan ba 16 snem shapoh jong ki khynnah kynthei (doubles) dei ka Aisukshisha Syiemlieh bad ka Naphilakyrmen Syiemlieh bad jong ki shynrang pat dei u Nadap bad u Mebakyrshan, , ha ka kyrdan ba 16 snem shapoh jong ki khynnah shynrang (doubles) dei u Nandap bad u Mebankyrshan.
Nangta, ha ka kyrdan ba 18 snem shapoh jong ki kynthei (single) dei ka Wansaphi Marpna bad u Asrian Mar’s Syiemlieh jong ki shynrang, ha ka kyrdan ba 18 snem shapoh jong ki kynthei (doubles) dei ka Ibapynkmen Snaitang bad ka Wansaphi Marpna, bad jong ki shynrang dei u Adrian Mar’s Syiemlieh bad u Batskhembok. Ki nongjop ha ka Mixed Double pat ki long u Donal Vicky Marpna bad ka Wansaphi Marpna.
Ha kane ka sngi la sam ruh ïa ka khusnam Most Promising Badminton Player ha ka 6th South West Khasi Hills District Inter-School Badminton Championship 2025 kata sha u Tyngshainlang Iawphniaw bad ka Alvatudor Marweiñ na ka Mawlangwir Govt Lower Primary School, Mawlangwir.
Lah ban kdew ba ki skul kiba wan ïashimbynta ki don baroh 11 tylli skul bad 143 ngut ki nongïashimbynta kata 100 ngut na ka liang ki khynnah shynrang bad 43 ngut ki khynnah kynthei.
Ha kane ka sngi la donlang naduh u bah Kynpham V Kharlyngdoh kum u kongsan ha ryngkat u bah H.S. Diengdoh, President ka South West Khasi Hills District Badminton Association, u Pastor L.E. Jyrwa, General Secretary barim ka South West Khasi Hills District Cricket Association, u babu Kynsaibor Marweiñ, Principal jong ka Balang Mawlangwir Higher Secondary School, ka babu Rebeldalis Syiemlieh, Assistant Teacher jong ka Christian Principles Academy, Mawkyrwat, u bah N. Wanniang, Myntri Shnong Mawlangwir, ki riew rangbah, ki nongïashimbynta na ki skul, lem bad ki nonghikai.
