Lah ban ther u lapbah bad ka lyer bajur naduh 27tarik – 1tarik Jymmang maham ka DDMA

Shillong, Ïaiong 27 : Ka Ophis treikam jong ka Deputy Commissioner, East Khasi Hills District ka la pynmih ka jingmaham ïa ki paidbah nongshong shnong ka distrik ba kin long kiba peitngor ha kine ki san sngi ban wan kaba kynthup naduh ka 27tarik Ïaiong tad haduh ka 01tarik u Jymmang mynta u snem.
Katkum ka kyrwoh na ka ophis jong u Additional Deputy Commissioner ba dei ruh CEO ka District Disaster Management Authority (DDMA) kane ka jingmaham ka dei hadien ba ka tnad ba peit ïa ka jinglong ka mariang ka India Meteorological Department ka la pynmih ka jingpynbna ba kan don ka jingbeh jong ka lyer kaba jur bad u lapbah ba jur nalor ka leilieh ha kitei ki san sngi.
Kumta na ka liang ki bor distrik bad DDMA ki la kyntu ïa ki paidbah ba kin khmih bad pynskhem bha ïa ki tiar ki tar kiba lah ban shah rong ha ka lyer kum ki thup dieng, ki tin sop lane mawit ba shong synjor, ki tin/ sop theh nuit, ki sign board bad kiwei kiwei ki mar kiba lah ban shah rong ha ka por ba jur lyer.
Nangta la kyntu ruh ba lada ka don ka jingthaba leilieh kaba jur bad nehslem kan bha shibun ba ki paidbah kin ym pyndonkam ne ban pynmeh ïa ki tiar elektrik kum ki mobile, isteri, radio, telebision bad kiwei kiwei ki tiar kiba pyndonkam da ka bor elektrik.
Ki bor distrik ki kyntu ruh ïa ki nongshong shnong ba ki dei ban long kiba phikir ban ïada ïalade namar ka jingshlei um ka lah ban jia hadien jong u lapbah khamtam ha ki jaka kiba harud jong ki wah bad ki wahduid.
La kyntu ïa ki paidbah ban kiar na kaba jam ïa ki wahduid, ki wahbah bad ki kshaid ha ka por ba jur slap. “Phim thikna ïa ka bor jong ka bad ka um kaba jyndong bad tuid sted ka lah ban pynkyllon ïa phi,” ong ka kyrwoh.
La maham ruh ba ym dei satia ban tur ne niah ïa ki kali haba don ka jingshlei um bad kiar na ki post electrik ban lait na ka jingshah bat ha ki bor electrik.
Shuh shuh la kyntu ïa ki paidbah ba ki dei ban phone ha u Number 112 lada donkam jingïarap ba kyrkieh haba don kino kino ki jingjulor.
La kyrpad ïa ki paidbah ban long kiba phikir bad shim ïa ki lad jingïada ban lait na kino kino ki jingmynsaw.