Shillong, Naiwieng 21: Ka Wahrew kaba don hapdeng ka Shnong Sohbar bad Nongjri ha khappud India bad Bangladesh, ka la pawnam naduh ba ladep shna bad plie ïa ka jingkieng ba long khilon pyllun ha ka snem 2021.
Ha kine ki arsnem, kane ka jingkieng kam shym la long shuh tang kum ka jingpynïasoh ïa kine ki ar tylli ki shnong ne ïa kane ka thaiñ, hynrei kane ka jaka ka la long kum ka Tourist Spot ne ka jaka leitkai pyngngad jong ki briew.
Ha kine ki ar snem kane ka Wah, ka la khring ïa ki spah bad ki hajar ngut ki nongleit peitkai pyrthei, la ka long kiba na ka jylla ne kiba na shabar ka jylla bad wat nabar ri ruh.
Kane ka jaka ka la kylla long itynnad ym tang namar ka jingshna ïa kane ka jingkieng, hynrei ka la khring ïa ki paidbah ruh namar ka jingkhuid bad ka jingsngur jong ka um ha ka wah. Ki kmie ki kpa ki sngewtynnad ban ïalam ïa ki khun wat kiba dang rit namar ka jingkhuid ka um bad ka jingpyngngad ka jaka.
Hynrei hapdeng kane ka jingitynnad bad ka jingkhring ïa ki nongpeitkai, kane ka wah bad ka jingkieng ki don hapdeng ka jingma ba ki lah ban duh noh ïa ka nam jong ka jingitynnad bad ka jingpyngngad, hynrei wat ïa ka jingkhuid ruh. Ka daw ka long ba ka la don ka jingsdang tih maw na jaka kaba don hajan kane ka jingkieng bad pyntuid pat ïa ka khyndew sha ka wah.
Ki paidbah na katei ka thaiñ, kiba la ïohi ïa ka jingma kaba mih na kane ka jingtoh maw, ki la pynpaw ka jingsngew pangnud ïoh ba ka jingitynnad jong ka mariang ha kane ka jaka ka duh noh. “Ngi sheptieng ïoh ba kane ka jaka kan duh noh ïa ka jingitynnad bad ki nongshang pyrthei kim wan shuh shane bad kan long ka jingduhnong hi ïa ngi”, la ong katto katne ki nongshongshnong.
Ki paidbah jong ki shnong katei ka thaiñ ki kham kdew bha ïa ka jingpyntuid ïa ka khyndew sha ka wah kaban lam sha ka jingjaboh bad ka jingjngut noh jong ka wah. Kumta ki kyntu ïa ki bor ba dei peit ba dei ban shimkhia ïa kane ka jingtih maw bad khamtam eh ka jingpyntuid ïa ka khyndew sha ka wah.
