Ladep pynbeit ka Meghalaya bad Assam ba ka kam rep kam dei ban shah pynthut ha ki jaka ïakajia

Shillong, Jylliew 03 : U Symbud Myntri Rangbah ka Meghalaya uba khmih ïa ka tnat Kam Pohïing, Bah Prestone Tynsong, ha ka sngi Balang u la ong ba ka Meghalaya bad Assam ki la poi sha ka jingïasngewthuh jingmut ban pynthikna ba ki kam rep kam riang ha khappud bad ka thaiñ Karbi Anglong kin ym shah pynthut namar ba ki bor sorkar na baroh arliang ki la dep ban tuklar ba ka dei ban don ka jingïa dei hapdeng ki paid nongshong shnong na baroh arliang.
Kane ka jingïasngewthuh jingmut ka la mih na ka jingïalang kaba la long ha ka sngi Baar, kaba la wan jingïashim bynta da ki nongïalam bad ki heh ophisar na baroh ar jylla.
“Ha ka jingïalang hynnin ka sngi, la wan ïashim bynta da baroh ki nongïalam na ka liang ki Karbi, kynthup ïa u Chief Executive Member (CEM) jong ka Karbi Anglong Autonomous Council bad ki heh ophisar jong ka Sorkar Assam,” ong u Bah Prestone haba kren bad ki lad pathai khubor. La ïa thuh ba ïa ka kynhun na Meghalaya pat la ïa lam da u Symbud Myntri Rangbah ka Jylla Bah Sniawbhalang Dhar.
Shuh shuh u la ïa thuh ba ha kane ka jingïa kren sngewthuh jingmut ka la ïoh ruh ïa ka jingkyrshan na baroh ar jylla bad na ki nongïa lam shnong ruh.
“Ha ka jingïalang hynin ka sngi, ngi la mynjur na baroh ar liang, bad kane ka la long ha ka jingdonlang ki Rangbah Shnong na Meghalaya bad na Karbi Anglong ruh,” u la bynrap shuh shuh.
“Ka jingïateh jingïasngewthuh jingmut ka shai bha. Ki kwah ban pynthikna ba ki kam rep kim dei ban shah pynsangeh ne pynthut shuh naduh mynta. Kata ka dei ka rai kaba la shim ha ka sngi Ba-ar,” u la ong.
“Ki bor jong ka sorkar jylla bad ki bor jong ka District Council ki la pynthikna ba ka kamai kajih jong ki nongshong shnong na baroh ar jylla ki dei ban ïoh ïa ka jingïada. Ka jingïadei kaba bha bad kaba sngewthuh jingmut ka dei ban neh ym dei tang shi taïew ne shi bnai, hynrei man la ka por naduh mynta,” la bynrap shuh shuhu Bah Prestone.