Lada phi kob bym don ka jingshalan be-aiñ ïa u dewïong ai tohkit ha ka CBI, kob sa ka HYC ïa ka sorkar

By Mawphor News Desk On Apr 14, 2023

Kawei na ki jaka tih dewiong ha Meghalaya

Shillong, Ïaïong 13: Ka Hynñiewtrep Youth Council (HYC) ha ka sngi Palei ka la takraiñ tyngeh ïa ka sorkar jylla halor ka jingjyllei ka jingshalan be-aiñ ïa u dewïong bad ka jinglen jong ka ba kam don satia ka jingshalan bad ka jingtih dewïong be-aiñ, ba ka HYC ka kob ba lada ka sorkar ka nud ban sait khuid ba kam don shisha ka jingkhïi dewïong be-aiñ ka dei ban aiti tohkit ïa kane ka jingkynnoh ha ka Central Bureau of Investigation (CBI) ba ka ki jingshisha baroh kin paw.
Haba kren sha ki lad pathai khubor u Bah Roberjune Kharjahrin u la ong ba ka ka sorkar na ka por sha ka por ka sait khuid bad thet kti ba kam don satia ïa jingkhaïi be-aiñ ka dewïong bad ong ba ka jingkren jong ki ka dei tang ka jingkren pyllait jynhaw.
U la ong ruh ba ka jingïai kam ba kam don ka jingkhaïi drewïong be-aiñ kan pynsammut ïa baroh ki paidbah khamtam kiba sah ha lynter ka surok ba ju ïaid ki trok kit dewïong.
Shuh shuh u la ong ba kane ka jingailad ka sorkar ban khaïi be-aiñ ïa u dewïong ka la long ka jingduh nong kaba khraw ïa ka jylla namar da bun bun spah klur ka khajna ba dei ban ïoh sha ka pla tyngka ka sorkar ka lait ei hynrei ka rung pat sha pla jong ki katto katne.
“Lada ka sorkar ka kob ba kam don shisha ka jingtih bad khaïi dewïong be-aiñ kumba don ka jingkynnoh ka dei ban aiti tohkit sha ka CBI ba ki jingkynnoh lamler kin shai lut,” u la ong.
“Ka jingweng noh ïa ka sorkar jylla ïa ka General Consent ne ka jingai jingbit kyllum lang ïa ka CBI ba kan pynlong ïa ka jingtohkit ïa kino kino ki jingkynnoh bamsap ka pynphalang ba ka don kaei kaei pat ha lyndet hynrei lada ka sorkar kam tieng ïa ka CBI balei pat kan weng,” u la bynrap.
Haba kynthoh halor ka jingshahther tyngeh ka sorkar ha ka High Court (HC) bad ka jingbthah ban wanrah da ki pulit kieng atiar(Armed Police Force) ne ki pulit Central Industrial Security Force (CISF), “Kane ka la pynpaw ba wat ka High Court kam ngeit ïa ka jingkam ka sorkar jylla” ong u Bah Robert.
“Lada ka HC ka la artatien ïa ka jinglah ki pulit ka sorkar jylla bad ka la hukum ban wanrah da ki pulit ka sorkar pdeng ban wan talasi ha kaba ka tulop ruh hap bei na ka pisa u paidbah ka jylla ngi sngewdei ban ai jingmut ba dei ban siew tulop ïa kine ki pulit ka sorkar pdeng da kaba khate ïa ka tulop ki pulit ka sorkar jylla kiba ym lah ban pyndep hok la ka kamram,” u la bynrap.