Shillong, Ïaïong, 12: Ka A·chik Conscious Holistic Integrated Krima (ACHIK) ha ka sngi Palei ka la dawa ba u snem ot kyrteng haba pyntreikam ïa ka roster system dei ban phaidien na u snem 1972.
Ha ka dorkhas ba la phah sha u Symbud Myntri Rangbah u Bah Prestone Tynsong, ka ACHIK ka la ong, “(ngi) kwah ban ïaiban ba ka seng ha ka kyrteng jong ki paid A·chik kan ieng beit halor ka nongrim ba kan ym lah ban ïapeiñ halor u snem ot kyrteng bad ka seng ka ieng beit halor ka nongrim ba u snem 1972 un treikam na ka bynta ka roster system haba pyntreikam ïa ka Meghalaya Job Reservation Policy kaba long ka lad ban wanrah ïa ka jingïaryngkat ïa ka jingshah leh bym hok jong ki paidbah A·chik.”
Ka Seng ka la maham, lada ka don kano kano ka jingleh bym hok ïa ki paidbah A·chik people, kan pynlong da ki jingïakhih katkum ki kyndon jong ka riti synshar paidbah kumba ka seng ka ladep lum lut ïa ki paidbah ha baroh kawei ka rilum Garo.
Ka ACHICK ka la byrngem ban leit tied wat ïa ka jingkhang jong ka ingbishar Supreme Court lada ki paid Achic ki shah leh bym hok lada ka don ka jingshim rai da ka Kynhun Myntri lane ha ka jingïalang jong ki seng saiñpyrthei halor ka mat kaba ïadei bad ka Roster System.
Ha kajuh ka por, ka ACHIK ka la kyrpad ïa u Symbud Myntri Rangbah ha kaba ïadei bad ka jingpynlong ïa ka Tura kum ka Nongbah baar jong ka jylla Meghalaya.
Katkum ka ACHIC, ka jingleh shiliang khmat jong ka Sorkar ha kaba ïadei bad ka jingbym wanrah ïa ka winter capital/nongbah baar ha Tura ka la pynlong ïa ki paidbah Achik ban shah iehbeiñ ha ka khih ka kamai, ka jingshah ibeiñ ha ka imlang ka sahlang, ka jingshah kyntait wat ha ka saiñpyrthei bad kumta ter ter.
