Shillong, Ïaiong 13 : Ka Election Committee ba la jied da ka CEC jong ka Khasi Students’ Union (KSU), ban pynïaid ïa ka elekshon kaba 15 sha ka ophis trei kam jong ka KSU na ka bynta ka samoi trei kam 2023-2026, ka pynbna ba ka elekshon kan long ha ka 06 tarik u Jymmang, 2023 naduh ka por 8 baje mynstep haduh 3 baje janmiet ha Dinam Hall, Jaïaw, Shillong.
Ha kaba ïadei bad kane ka phang, kane ka Committee ka khot ka wer ïa baroh ki khun samla kiba la ih jong ka Bri u Hynniewtrep, khamtam na ka liang ki dkhot jong ki unit bapher bapher ka KSU ba kin mih shakhmat ban ïakit ïabah lem ïa ka lyngkor ba khia jong ka KSU na ka bynta ka ri bad ka jaitbynriew, da kaba ïashimbynta shitrhem kum ki kyrtong ha katei ka elekshon.
Ka kyrwoh na ka seng ka ong ruh ba ïa ki nomination paper yn sdang ban ai naduh ka 14 tarik u Ïaiong haduh ka 20 tarik u Ïaiong, 2023 naduh ka por 11 baje mynstep haduh 5 baje janmied na ka Ophis trei kam ka KSU. La pyntip ruh ba na ka bynta ban pynpoi ïa ki nomination paper kan long naduh ka 15 tarik u Ïaiong haduh ka 20 tarik u Ïaiong, 2023 haduh ka por 5 baje janmiet bad ka jingweng kyrteng lada don kan long ha ka 21 tarik u Ïaiong haduh ka por 5 baje janmiet.
La pytnip ruh ba ka jingbishar ïa ki nomination paper kan long ha ka 22 tarik u Ïaiong, 2023 ha ka por 1:00 baje nohphaisngi. La ong ruh ba ïa ki nomination paper dei ban pynpoi ha lane shwa jong katei ka tarik ba la kdew haneng ha u Chairman lane Secretary ka Election Committee.
Ka Seng ka ong ruh ba ka Election Committee ka bthah ïa baroh ki Unit, Circle, Area Unit, Division bad District Unit ban pynpoi ïa ki kyrteng jong ki nongjied kaba long 10 ngut na kawei kawei ka unit hapoh ka 25 tarik u Ïaiong, 2023 ha Ophis trei kam jong ka Seng ha Jaïaw.
Ki post ki ban pynïakhun ki long President, Vice-President, General Secretary, Assistant General Secretary, Education Secretary, Organising Secretary, Information & Publicity Secretary, Office Secretary, Sports & Cultural Secretary bad Environment Secretary.
Haba ïadei bad ka result la pyntip ruh ba yn sa pynbna ha kane kajuh ka sngi.
Ka Committee ka pyntip ba ka la jied ïa ki katto katne ki riew rangbah ki nonghikai bad kumjuh ruh na ka liang ki lad pathaikhubor ban long kum ki nongpeitpyrman ïa ka jingïaid beit ïaid ryntih jong kane ka elekshon.
Kane ka long katkum ka kyrwoh na ka Chairman ka Election Committee jong ka KSU, Bah Danny M Khyriem bad ruh na u Secretary ka Committee, Bah SamueL B Jyrwa.
