Shillong, Ïaïong, 12: Ka Khun Hynñiewtrep National Awakening Movement (KHNAM) ha ka sngi Palei ka la ong ba ka jingpynlip bording khah khah ka dei ka jingpynkheiñ ïa ka hok ban pyndonkam ïa ka bording da ka Meghalaya Energy Corporation Limited (MeECL) katkum ba la kdew ha ka “Electricity (Rights of Consumers) Rules, 2020” bad ba la pynbna da ka Sorkar Pdeng.
Ha u kyrwoh, u vice president jong ka KHNAM u Bah Thomas Passah u la ong ba ka tnat Sam Bording jong ka Sorkar Pdeng ka la wanrah ïa ka rul ba la kdew ïa ka hok jong ki nongpyndonkam ïa ka bording ha ka ri baroh kawei.
U ong ba u Myntri Khynnah uba peit ïa ka tnat Power and New & Renewable Energy u la ong, “kine ki rul kin pynkup bor ïa ki nongpyndonkam bording bad bynrap ba kine ki rul kin pynïaryngkat na ka jingpyndonkam ïa ka bording bad ba ki nongpyndonkam ki don ïa ki hok ban ïoh ïa ka jingshakri kaba pura bad ka jingpynbiang bapura ïa ka bording.”
U Myntri u la ong ba ki Distribution Companies ha baroh kawei ka ri ki dei ki nongsam bording, la ki dei na ka Sorkar na ki kompeni shimet bad ki nongpyndonkam kim don lad namarkata ka long kaba donkam ba ïa ki hok jong ki nongpyndonkam bording dei ban bsut hapoh ki Rul bad ka jingpyntreikam ïa kine ki hok ban da pynbna paidbah, ong u Bah Passah.
Katkum ka jingong jong u, ki mat ba kongsan kiba la kdew ha ka rul ki long, ka hok jong ki nongpyndonkam bording bad ka kamram ban ai ïa ki laisen, ka jingpynbiang pura ïa ka bording, ka rukom pyntreikam jong kiba la ïoh laisen bad ka jingsiew bailutksan.
“Ki jingpynlip bording khah khah ba la mad da ki paidbah ka dei ka jingpynkheiñ ïa ka hok jong ki nongpyndonkam katkum ki rul jong ka Sorkar Pdeng bad ka Sorkar Jylla ka dei ban shimkhia halor kane,” la dawa une u nongïalam ka KHNAM.
Shuh shuh u la ong, ha kajuh ka rukom ka jingkyrduh kaba ki paidbah kiba sha ki jaka Municipal ka long kaba palat liam wat hadien ba ki paidbah ki la siew ïa ka khajna sha ka Sorkar bad ka um ka dei ka bynta kaba kongsan ha ka jingim briew.
“Namarkata, lah ban ong ba ka jingkyrduh um kaba khah khah ka dei ka jingpynkheiñ ïa ki hok ban im jong ki paidbah nongshong shnong jong ka jylla,” u la ong.
