Lada kwah Chief Minister na Khasi bad Jaintia donkam ban ïatylli : President MPCC

Shillong, Risaw 23 : U President ka Meghalaya Pradesh Congress Committee (MPCC) u ma Vincent H Pala u la ong lada ki paidbah ki kwah ban ïoh Chief Minister ( Myntri Rangbah) na ri lum Khasi bad Jaintia ha kane ka kynti ki dei ban ïatylli.
“ Lada ki paidbah ki kwah ban ïoh Myntri Rangbah na Khasi bad Jaintia ki dei ban ïatylli kawei” ong u ma Pala.
U la ong ha ri lum Garo ki don tang lai tylli ki party ki ban ïakhun ïa ka election ha u 2023 kata ka NPP, ka Congress bad ka AITC katba ha ri lum Khasi bad Jaintia kin don palat ïaka 13 tylli ki party ki ban ïakhun kynthup ïa ki kyrtong shimet.
“ Ha kajaka ban don tang khyndiat tylli ki party ki ban ïakhun ha Khasi bad Jaintia hynrei ki la nang bun palat kumta ki paidbah kin sa ïohi kaei ka result kin ïoh hadien ka election namar ngam pat kwah ban ong lypa mynta” ong biang u ma Pala.
Haba kylli, u ma Pala uba dei ruh u MP ka Shillong Parliamentary Constituency u la ong “ U Symbud Myntri Rangbah ka jylla u bah Prestone Tynsong u dei u nongïalam uba la shemphang bha ïa ka kam ym lah ban len ïa kata bad ngam pat ju ioh sngew ba u dawa pisa kumba dawa kiwei ki Myntri Sorkar”.
Da kaba ong ba u briew u tyrwa hynrei ka dei ka mon U Blei ka ban pyntreikam, u ma Pala u la ong kumno u bah Tynsong u la duh ban long kum u Myntri Rangbah ka jylla nalor ba u la shah jied kum u nongïalam ka Legislature Party jongka NPP ha u snem 2018.
“ Ha ka jingshisha u la dei ban bam smai kum u Myntri Rangbah hynrei kumno pat u duh noh ïa katei ka kabu. Ngam tip la u bah Prestone un ïai duh shi ïai duh ïa kane ka kabu ne ha kane ka kynti u lah ban ïoh noh. Namar ngam tharai ba u Conrad Sangma un ailad ïa u bah Prestone namar u Conrad u la dep mad ïa ka snam jongka. Ka shong beit ha ka jingïapynbeit jongki namar ym pat tip ruh la kin jop bun seat ne em” ong u ma Pala.
U ma Pala u la ong shuh shuh ba lada un ïoh lad u bah Prestone un trei bha kum u Myntri Rangbah ka jylla bad un long ruh u myntri rangbah uba tbit bha.
“Kum u briew, u bah Prestone u long uba bha, hooid ngi kum ki politisian ne ki riew saiñpyrthei ngi don la ki jong ki jingduna bad jingeh, hynrei nga tip shai kumba u long uba la shemphang bha ha ka saiñ pyrthei bad u nongïalam uba la ih bad tbit bha lada u ïoh lad un ai ka jingshakri ba paka ïaka jylla kum u Myntri Rangbah” ong biang u ma Pala.
Haba kylli ïa u nongïalam ka UDP uba dei ruh mynta u Lamphang ka ïing dorbar, u President ka Congress u la ong “ U bah Metbah Lyngdoh u lah ban long u nongïalam ka UDP bad ban ong ba u dei u nongïalam ki paid Khasi bad Jaintia kata ka shong sa tang ha ki paidbah ban rai. Kam mut ba u dei u nongïalam ka UDP un long u nongïalam ki paidbah ka Khasi bad Jaintia ki dang don bun ki nongïalam”.
Kumba long mynta u long u President ka UDP, hynrei tang ïa ki MDC kum u bah Paul Lyngdoh bad CEM bah Titosstarwell Chyne ruh um lah ban teh lakam namar dang shen ka mih ka sur na ki nongïalam ka UDP ba ki dawa ban pynhiar shuki ïa u myntri kam pohïing u ma Lahkmen Rynbui.