Sangeh ka ïalam bakla halor ka jaidbynriew jong ngi, ong ka KSU ïa ka Netflix India

Shillong, Risaw 23: Hadien ba ka Netflix India ka pynmih ïa ka video ha ka rynsan jong ka shaphang ka jimngrakhe Diwali ha Sohra, u General Secretary jong ka KSU u Samla Donald V Thabah u la ong ba kaei kaba ka Netflix India ka pyni ka ialam bakla namar ym tang ba ki nongshim bynta kim phlang ia ki trai muluk jong kato ka jaka hynrei ka jingpydonkam ïa ka kyrteng Cherrapunjee ruh ka pyni ba ka ialam bakla ia ki nongpeit kane ka video ha satlak ka pyrthei.
“Ha ka Ri jong nga ka Khasiland kam ju don kum kata ka kyrteng Cherrapunjee hynrei ka don tang ka Sohra. Cherrapunjee ka dei tang ka kyrteng rngai ba la wanrah da ki Chamcha Bengali jong ki Phareng,” ong u Donald ha Social Media jong u.
“Ki Khasi ki dei kiba ngeit ha ka Niam Tynrai/Niamtre bad ha ka jingngeit Khristan” u la bynrap.
U la ong ruh ba kumba ka Diwali ka dei ka tamasa jong ka jingshai kumta ka Netflix India ruh ka dei ban pynphalang ïa kaba dei ïa ka jinglong ka jaidbynriew, ka rukom im, ka jingngeit bad ka jingangnud kaba ka jaidbynriew ka don ym ban ïalam bakla da ki dur bad ki video ia ka pyrthei salonsar shaphang ka ri bad ka jaidbynriew jong ngi.
Ban shu kdew hangne ba ka Netflix India ka la pynlait paidbah ïa kawei ka video jong ka shaphang ka jingrakhe Diwali ha Sohra ha ka jingther u lapbah lapsan bad ba ha kane ka video ïohi ba ki nongshim bynta kim dei kiba syriem dur bad ngi hynrei kiba phalang pynban ïa kiwei ki jaidbynriew ka thaiñ Shatei lam Mihngi ka ri India bad ruh ki ktien ba ki kren ki dei ha ka ktien Hindi bad ka don ka jingrwai kaba ki rwai ha ka ktien Khasi ruh.