Lada ki pharep ba dei ka ABVP ba phah ïa ki runar sha NEHU ujor sha ki Pulit: Nibiang Sumer

By Mawphor News Desk On Mar 26, 2024

Shillong, Lber, 24: Ka Organising Secretary jong ka Akhil Bharatiya Vidyarthi Parishad (ABVP) East Khasi Hills District Kong Nibiang Sumer ha ka sngi Saitjaiñ ka la kyntait ba ka ABVP kam don bynta eiei ruh em bad ka jingïalum jong ki briew kiba kah durkhmat ba rah bad ki tiar pynmynsaw hajan ka Petrol Pump ha phyllaw ka skulbah North Eastern Hill University (NEHU), Shillong ha ka 21 tarik mynta u bnai.
Kane ka nongïalam jong ka ABVP ha ka jingïakren bad u nonglum khubor ka la dawa ruh ïa ki nongïalam jong ka North Eastern Hill University Students Union (NEHUSU), kata ïa u Banpynbiang Riang bad ïa u Mandor Diengdoh ban ujor sha ki Pulit lada ki lap shisha ba dei ka ABVP kaba phah ïa ki briew kumba 40-50 ngut sha skulbah NEHU.
Kum ban shu pyntip hangne, ha ka miet 21 tarik mynta u bnai ki Pulit SOT bad ka Mawkynroh Out Post ki la hiar sha skulbah NEHU hadien ba ki la ïoh jingtip na ki nongïalam ka NEHUSU halor ka jingdon jong ki briew kiba kah durkhmat bad kiba rah ïa ki tiar pynmynsaw kiba ïalum hajan ka Petrol Pump ha NEHU.
Ka khubor ka la saphriang ha Social Media ba ki don kumba 40 ne 50 ngut ki briew ba la kah durkhmat bad kiba rah ïa ki tiar ki tar pynmynsaw ki la rung ha skulbah NEHU ban thwet ïa u Banpynbiang Riang bad ïa u Mandor Diengdoh hadien ba kine ki arngut kiba dei ruh ki nongïalam jong ka Hynñiewtrep Youths Council (HYC) la kynnoh ba ki la pynsangeh ïa ka prokram kaba dei halor ka Indian Modern Literacy Language. Ki nongïalam ka NEHUSU ki la kam ba ynda la bishar bha ka dei ka Education Cell jong ka RSS.
Ki Pulit kiba la leit sha kane ka skulbah kim shym la lap shuh ïa ki briew ba kah durkhmat bad rah tiar pynmynsaw hynrei watla katta ki la peitngor bha ïa ka jinglong jingman hapoh kane ka skulbah ban tem ïa kino kino ki jingïakynad kiba lah ban mih ha kano kano ka por.
Ka Kong Sumer ka la ong, “ha ka jingïakynduh ïa ki nongïalam ka NEHUSU kiba dei ruh ki dkhot ka HYC ngi shu kylli ïa ki na kaei ka daw ba la pynsangeh ïa ka prokram bad ki ong ba ka don jingïadei bad ka RSS. Kane ka prokram kam dei jong kiwei hynrei ka dei ka prokram jong ka Hindi Deparment hynrei ma ki pat ki pynmih ba ka don jingïadei bad ka RSS bad ba ka ïadei bad ka niam Hindu. Ngi kwah ban tip balei ki Hindu kim lah seh ban long prokram?”
Ka la kynthoh ruh da kaba ong, “ka jingkren jong u Banpynbiang Riang ha ka khubor ba la mih ha ka YouTube Channel (jong kawei ka lad pathai khubor) ka long thik kumba ong ba dei ma ngi kiba phah. Ngi dei tang ka seng ki samla pule bad haba ngi kwah jingpynshai ngi wan beit ha ka por mynsngi.”
“Lada ki kynnoh ba dei ka ABVP kaba phah ïa ki runar ki dei ban ujor sha ki Pulit hynrei ym dei ban shu kren tang ha ki lad pathai khubor. Ma ngi ruh ngi lah ban ai ujor sha ki Pulit. Khot lang ïa ki dkhot ka AVBP bad ïa ki dkhot HYC ha Police Station bad sa peit ïa ki Mobile Phone mano ba telephone ïa kito ki runar ban wan ha skulbah,” ka la ong.
Ka la ong ruh ba baroh ki briew ki tip bha ïa ka jinglong jingman ha skulbah NEHU ba ym dei tang ha kato ka sngi ba ki don ki briew kiba kah durkhmat bad rah tiar pynmynsaw hynrei wat ha kiwei kiwei ki sngi ruh ka ju jia.
“Tangba balei pat ha kato ka sngi ki (nongïalam ka NEHUSU) ai da ka kyrteng jong ka ABVP? Lada ki don eiei pyrshah ki dei ban ujor beit da ka ejahar bad ngi lei ngi long kiba la kloi ban leh ïa kata bad kim dei ki briew jong ngi,” la bynrap ka Kong Sumer.
“Lada ki ong ba ka dei ka Secular University (ka skulbah bym ïadon bynta eiei bad kano kano ka niam) hynrei balei pat ki pynmih ba dei ka Hindu ngim shah. Na kata ka daw, kito ki briew ki dei kiba sheptieng ïa ka niam Hindu. Lada ki kwah ban pynïaid ïa ka skulbah jong ki ngin wad ïa ki briew jong ngi na ka skulbah ban weng noh bad kin pynïaid noh ma ki hi,” ka la ong.
“Lada ki ong ba ym ïadon bynta eiei bad kano kano ka niam hynrei balei kim shah ïa kiwei pat ki seng ban pynlong prokram. Ka ABVP ka dei beit thik tang ka seng ki samla pule. Lada ki don jingwit ïa ki nonghikai Hindu bad ïa ki khynnah pule Hindu namarba kane kam dei ka NGO University hynrei ka dei ka Central University bad lada ki pharep kumta ïa ngi ki dei ban ujor da ka case,” la ong shuh shuh ka Kong Sumer.