Haduh mynta ngim pat jied ïa ki nongmihkhmat kiba pura kum ki nongïaleh : President HANM

Jowai, Lber 25: U President Rangbah jong ka seng Hynñiewtrep Achik National Movement (HANM) u bah Lamphrang Kharbani ula kren diaw da kaba ong “haduh mynta ngim pat jied ïa ki nongmihkhmat kiba long shisha ki nongïaleh, hynrei ngi jied pynban ïaki nongmihkhmat kiba long tang ki nongïa kynthoh para ma ki kawei ka seng siañ hima ïa kawei pat”.
Ïa kane ki kyntien u President Rangbah ula kren mynta ka sngi haka jingïalang pyntian smai ïa ki nongkitkam ba thymmai ka HANM West Jaiñtia Hills, haka jingïalang ba la pynlong ha GHM Guest House jingkieng Myntdu.
Kumba long mynta u bah Kharbani ula ong ka jait bynriew kam pat ïoh satai ïa kita ki nongïaleh kiba long kum u ‘Kiang Nangbah bad u Tirot Sing’, naduh bala ïoh ïa ka jylla ha u snem 1972, hynrei haduh mynta ka jylla kam pat don ïa ki aiñ ïada Ri kata naduh ka Inner Line Permit (IPL), ban rung ka ktien Khasi hapoh kyrnit kaba Phra ka Riti synshar ka Ri India bad u Pud u Sam uba pura la 52 snem mynta.
Ym lah ban len ngi la kiew ha baroh ki liang naduh ka kam Sport, ki jaka sumar, ki surok, ki lynti syngkeiñ, hynrei ngi dang hiar sha kawei pat ka liang kata ba ngim don shuh ka mynsiem jingïakhun na ka bynta ka ri bad ka Jaitbynriew, la ban jur utei u President.
Haoid ngi la don ka Land Transfer Act, ka Six Schedule hynrei kine kim pat biang katkum ka jingdawa jong ka por ïa Ri bad ka jaitbynriew, kine baroh ngim don ïa ki nongïalam kiba ïakhun bad ngim shem la pynmih ïa kita ki riew proh jabieng kum ki IAS, IPS bad kiba bat ha ki kyrdan ba halor.
“Ki seng saiñ hima sima mynta ki ïatan patlun iwei ia iwei, dang ha kine ki sngi ka VPP ka kynthoh ïa ka NPP, katba ka NPP ïa ka VPP, ïa ka UDP bad ïa kiwei de ter ter. Kane ka dei ka daw bah daw san kaba pynsuki ïaka sorkar India ban kheiñ sting ïaki jingdonkam ban ïada ïa ka jaitbynriew, la kynthoh u bah Kharbani.
Kum ki nongïalam ka seng kin long kiba la pynkhreh shwa namar ka jingmynsaw bad ïaumsnam kala ap lypa ïa ka jaitbynriew namar ka kyndon aiñ jong ka CAA. Shuh shuh u ong ka jingpyntreikam ïa kane ka CAA kin sa ïoh lad ïa ki mynder ri, ki khar muslim bad ki khar Bangladesh ban wan tyllep ïa ka jaitbynriew, namar ka jaitbynriew ka don tang kumba 16 lak ki nongshong shnong bad kitei ki heh pait (bar jylla) ki lah ban pynduh pyndam shi syndon ïa ki riti ki dustur, ha kaba ki trai jylla kin long tang kum ki nongtong um bad nongthohdieng jongno re jongno.
La ïathuh hashwa ba kane ka umsaw kan wan hapoh ka Ri na ka liang ka HANM kala rai mar sien kut ka MP Election haka sien kaba ar kin hap leit biang sha Delhi ban tied jingkhang ïa ka sorkar ha Delhi. Utei u President Rangbah ula ong lada ka treikam pura ka CAA la tikna kan sa jia ka thma bha hapoh ka jylla namar ka seng HANM kan ym ailad satia da lei lei ba ka jaitbynriew Khasi/Pnar kin long ki nongtrei ïa ki bar jylla. Namar kata ka seng ka kren shai ba ka sorkar ka dei ban ai noh ïa ka ILP kaba long ka nongïada ïa bar jylla ban ïoh rung shapoh ka ka jylla, da kaba u buh jingkylli balei ïa kiwei pat ki jylla ka sorkar India la ai katba ïa ka jylla Meghalaya ym shem la ai satia?.