Ka party NPP kaba la kiew bha ka jingsarong ka jingsngew meng mynta khamtam hangne ha jylla Meghalaya jong ngi, shen kan sa hiar kyrdan noh na ka kyrdan (status) National Party kaba ka la ïoh na ka Election Commission jong ka ri India (ECI) ha ka 7 tarik Jylliew 2019. Ka Election Commission of India (ECI) ka la sdang ban peitngor (observes) bha kliaw mynta ïa ka jinghiar arsut jong kane ka party ha kiwei kiwei ki jylla (states) kiba don kylleng ka ri India khamtam ha North East.
Katkum ki kyndon (guidelines/criteria) jong ka Election Commission of India(ECI), kino kino ki political party kiba la pynrung kyrteng (registered) ha ka Election Commission of India(ECI), lada ki lah ban jop ne don MLA ha ki saw (4) tylli ne palat ban ïa kata, ha ki state ka ri India, kum kita ki party yn ithuh noh (recognised) ïa ki kum ki party solonsar ka ri India (National Party). Hynrei, lada ki duh ne kim lah jop shuh ha ki saw (4) tylli ki state ha ki khyndiat snem kiba wan, kum kata ka party pat kan sa shah pynduh ne sloit kyrdan biang (derecognise) noh ha ka Election Commission of India (ECI).
Ha kine ki khyndiat snem kiba la dep, ha ka por ba ïalam hi u (L) P.A Sangma ïa ka NPP, ngi ïohi ba ka Party NPP ka la jop MLA ym tang ha North East hynrei ka la jop ruh ha kiwei de ki state ka ri India kum ka Rajasthan kaba la jop 4 seat eiei hapoh ka jingïalam jong u Kirodi Lal Meena, u MP Independent ha kito ki por na state Rajasthan. Kane ka party ka la jop ruh ha Arunachal Pradesh, Manipur, Nagaland nalor ka Meghalaya jong ngi. Dei na kata ka daw ba ka Election Commission of India ka la bishar ïa ka jinglah treikam (performance) jong kane ka party ha kito ki snem ba la dep, ka la ithuh noh kum ka National Party namar ka la jop bad don MLA palat ïa ki saw (4) tylli ki state ka ri India.
Lada phai pat mynta, kane ka party ka la nang hiar arsut ka rukom trei kam (performance) jong ka ha kiwei kiwei ki state ka ri India. Ha Rajasthan kam ïoh ne jop MLA shuh ha kane ka MLA election ba dang shu dep shen. Ha Arunachal Pradesh pat, ki MLA jong ka ki la leit rung (join) syndon kluk sha ka BJP. Ha Nagaland ruh, imat ki MLA jong ka ki leit pynïasnoh sha BJP. Ka don MLA mynta sa tang ha ki ar (2) tylli ki state, kata, ha Manipur bad Meghalaya jong ngi. Lada kam lah ban jop biang ne ïoh MLA shuh sa kumba ar (2) tylli ki state, ka Election Commission of India (ECI) kan sa pynhiar kyrdan (derecognise) biang ïa kane ka party ha kine ki snem ki ban wan.
Kat ka bor bad jingkhlaiñ jong ka party TMC jong ka Mamata Banerjee ha West Bengal ruh ka la shah pynhiar kyrdan (derecognised) na ka kyrdan National Party namar kam lah jop satia ha ki saw (4) tylli ki state ne palat ha ri India ha kine ki snem ba la dep. Tang ka Aam Army Party (AAP) ka la shah pynkiew kyrdan (recognised) kum ka National Party namar ka la jop bad don MLA mynta palat ïa ki 4 tylli ki state ka ri India.
Don ki nongpeitngor (political observers) kiba ong ba dei tang kane ka party (NPP) kaba la ïoh ïa ka kyrdan National Party hynrei kaba khaweit bad tieng thot thot ban pynïaleh MP mynta ka kynti na kiwei kiwei ki state ka North East lait noh sa tang na Meghalaya ba ka bat sorkar. Haba ka kyntien phira (motto) jongka ngi ïohi ba ka dei ka ‘Sur jong ka North East (Voice of the North East)’, balei pat kam nud satia ban pynïaleh MP na Assam tang kumba 3 ne 4 seat eiei, balei ha Manipur, Nagaland, Mizoram, Sikkim, etc. Balei ka la leit ai jingkyrshan ïa ka BJP ha Arunachal Pradesh khlem ki nongrim kiba biang?. Kam don jingmut ne kam myntoi satia kata ka kyrdan National Party lada pynïaleh MP tang kumba 2 seat eiei ha Meghalaya la jong.
Hynrei, kaba kham ma eh ïa kane ka party NPP ka dei ka jingai jingkyrshan ka BJP na Delhi ïa ka Shillong bad Tura seat. Ka party BJP kam treh satia ban buh Candidate MP nangne ha Meghalaya baroh 2 seat hynrei kan kyrshan tylli tyllang ïa ki Candidate jong ka NPP, hana, ba ki ïa dei kajuh ka ïing NDA. Ki ‘riew stad pyrkhat ka sorkar BJP na Delhi ki la tip lypa ba ka Meghalaya ka dei ka Christian state kaba khlaiñ bha. Ka la tip bad sngewthuh lypa ruh ba kam don jingmyntoi kata ka nongrim Hinduva/Hinduta ha Meghalaya.
Ka la pyrkhat sani bha ban ïaid noh (applied) da kawei ka nongrim ba, ban jop ne pynjot ïa ki nongtuh, dei ban pyndonkam hi da ki nongtuh ban jop ne pynjot pat ïa ki men dih, dei ban pyndonkam hi da ki nongdih kiad. Kumjuh ruh ban jop ïa ki Christian ka North East, dei ban ïoh hi da ki Candidate Christian hi. Kane ka buit tuh (hidden agenda) ka BJP ka la pyntreikam ha Meghalaya. Ban jop ïa ki Christian ka Meghalaya, ki kyrshan ne ai noh da ki candidate Christian hi ba la pynïeng da ki paralok NDA.
Da kane ka buit kan sa jop bad ïoh jingshaniah syndon suki suki na ki paidbah jong kane ka Christian State jong ka North East. Tip ki paidbah ka state jong ngi ka ïa tip ne sngewthuh ne em ïa kum kine ki rukom pyrkhat rieh jong ka Delhi kaba kham stad bad kham shemphang shibun shah ban ïa ngi hangne?
