Mawkyrwat, ‘Nailur 05: Kum shibynta jong ka jingïasnohktilang bad ka ri India baroh kawei ha ka jingrakhe ïa ka lyngkhuh sngikha jong u Dr. Sarvepalli Radhakrishnan, ïa kane ka sngi kyrpang la rakhe ha Maharam Government Higher Secondary School Auditorium, Mawkyrwat, South West Khasi Hills District ha kaba u bah T. Lyngwa, IAS, Deputy Commissioner of South West Khasi Hills District u la long kum u kongsan.
U bah T. Lyngwa, IAS, Deputy Commissioner, South West Khasi Hills District haba kren ha kane ka jingrakhe ïa ka sngi kyrpang ki nonghikai u la pynkynmaw ba ka dei kawei na ki sngi jong ka jingrakhe bad kynmaw ïa ka sngi kha ba kyrpang jong u Dr. Servapalle Radhakrishnan uba la ong uwei na ki nonghikai ba khraw bad uba la aiti lut lyngba ka jingtrei shitom na ka bynta ka lawei ba phyrnai jong ki khynnah. “Ka kam hikai, kam long kaba suk lymda ki long kiba tbit, hynrei tang kita kiba don ia ka sap ka phong kaba U Blei U la ai kyrpang ki lah ban neh bad ïaishah ha ka kam namar ban long nonghikai donkam ïa ka jingïai-shah, ka jingtrei shitom bad ka jingaiti lut met bad mynsiem”, ong u bah Lyngwa.
Namarkata, u la pynshlur bad ai mynsiem ia ki nonghikai da kaba kdew bad pyni ba kum ki nonghikai kim dei ban noh mynsiem wat hapdeng ki jingeh kiba ki iakynduh hynrei ban iai trei bad ïaid shakhmat ban pyndep la ki kamram da ka mynsiem ka jingkitkhlieh.
Ha kawei pat ka liang, u la pynpaw ruh ka jingkhublei kaba kyrpang na ka bynta ki nonghikai kiba la shah pynkup burom kiba la noh synñiang ïa ka imlang sahlang bad khamtam eh ban ai ka jinghikai ne ka jingnang jingstad na ka bynta ki khun ki kti jong ngi da kaba kyntu bad ai mynsiem ïa ki ba kin nang trei bad jam shaphrang namar khlem ma ki ka ri kan neh ha ka jingsah dum.
Ïa kane ka prokram la pynlong da ka ophis jong ka District School Education Officer, SWKHD, Mawkyrwat ha ryngkat ka jingïadonlang u bah S.S. Lyngkhoi, Additional Sub Divisional School Education Officer, South West Khasi Hills District, u bah S. Kharbteng, Sub Inspector of Schools, u bah G.D. Nongsiej, Principal jong ka Maharam Government Higher Secondary School, Mawkyrwat, ki nonghikai, ki khynnah skul bad kiwei de.
Ha kane ka sngi la ïoh ban sam ïa ki khusnam sha ki 5 ngut kiba dei ki nonghikai bad ki Scout Master kata sha u babu Phimlandstar Thongni, Headmaster jong ka Nongtynñiaw Deficit Upper Primary School, u babu Chrispin Wahlang, Assistant Teacher jong ka Presbyterian Higher Secondary School, Mawlangwir, u babu Earnes Marweiñ, Head Teacher jong ka Jakrem Government Lower Primary School. Nangta, sha u babu Kenny Mathew Majaw, Assistant Teacher bad kum u Scout Master jong ka Nativity Higher Secondary School, Mawkyrwat bad ka babu Insyrpaihun Kharlyngdoh, Assistant Teacher bad Guide Master jong ka Jingiaseng Kynthei Mawkyrwat Presbytery Higher Secondary School, Mawkyrwat.
La pynshit pynshngaiñ ïa kane ka program da ka jingrwai pdiang na ki khynnah skul jong ka JNV Mawkyrwat bad ka Cultural Dance na ka Mawkyrwat Presbyterian Secondary School.
Ïa ka jingïalang la pynïaid da ka kong Nadine G. Jyrwa bad na ka kong Medaline Iawphniaw katba ïa ka jingkren khublei na u bah S. Kharbteng, Sub Inspector of Schools.
