Lada dang lap ba khleh Formalin yn khang biang ka Sorkar ban wanrah dohkha na shabar: Ampareen

Shillong Jylliew 27: Ka Sorkar Jylla ka lah ban pynjari biang ïa ka hukum ba khang ban wanrah ïa ki dohkha kiba nabar ka jylla, lada shem ne lap ba ka don ka jingkhleh ne theh biang ïaka dawai Formalin ha ki dohkha.
ïa katei la ïathuh da ka Myntri ka tnad ka koit ka khiah ka Kong Ampareen mynta ka sngi Baar haba ïakren bad ki nongthoh khubor. “Lada lashai ngi leh ïa ki Test bad ngi shem ba ka jur bha ka jingai ïa ka dawai Formalin ha ki dohkha, kumta sa shisien ngin hap ban pynjari biang ïa ka hukum ba khang ban wanrah ïa ki dohkha nabar ka jylla” ong ka Kong Ampareen.
Kane ka jingkren ka jong ka, ka la mih hadien ba ka sorkar jylla ha ka 24 tarik mynta u bnai, ka la weng noh ïa ka jingmana kaba khang pyrshah ban wanrah ïa ki dohkha nabar ka jylla.
Ka la ong, ba nangne shakhmat yn bteng ïa ka jingleh test ïa ki dohkha kiba wanrah na shabar ka jylla.
Kane ka Myntri Sorkar ka la ïada ruh halor ka jingkylli la ka la don ka jingbym ïa pyntip eiei hapdeng ka tnad Food Safety bad u Myntri Rangbah ka jylla.
Ha ka Lah Sngi U Blei, u Myntri Rangbah ula ong ba ka sorkar kan bteng ban khmih bniah ïa katei ka jingjia hashwa ban weng noh ïa ka jingpynjari ïa ka jingmana ban khang wanarah ïa ki dohkha kiba nabar ka jylla, watla ïa katei ka jingmana la dep ban weng noh ha ka 24 tarik u Jylliew.
“U Myntri Rangbah ula jubab ïa ka jingkylli jong ki nongpathai khubor ïa kaei ka jingsngew jong ka sorkar jylla halor katei ka kam bad ka jingkren u Myntri Rangbah ka long kaba shai ba ka jingmana ban khang kan ïai bteng lada la shem biang ba ka don ka jingai ïa ka Formalin ha ki dohkha la ka long khyndiat ne shibun namar ka Formalin ka dei ka bym long ban pyndonkam. Kumta u Myntri Rangbah ula ong, ba lada lashai la lap ba la leh biang ha ka jingleh test da ka tnad Safety kumta yn hap ban weng mardor ïa kitei ki dohkha” ong ka Kong Ampareen.
Ka Myntri ka koit ka khiah kala ïathuh ba ka la ïoh ban ïakren bad ki nongkhaïi bad nongdie dohkha bad ki la pyntip ba ki la ïoh ïa ka syrnod naka sorkar Karnataka.
“Haei katei ka jingai dawai ïa ki dohkha ka la jia bad phi hap ban tip kum ki nongdie dohkha. Lada nga wanrah eiei hapoh ïew bad nga die ha phi, nga hap ban pynthikna ba ka dei ban don ka jingshim ïa ki lad kiba shngaiñ” ong ka Myntri Sorkar bad ka bynrap “Ki kyndon jong ka jingpynkheiñ ïa ka Food Safety yn hap ban pyntreikam”.
Ka la ïathuh ruh ba la bthah ïa ki Food Safety Inspector ba kin wad katno sngi ka shim por ban pynpoi ïa ki dohkha na kiwei pat ki jylla shapoh ka jylla Meghalaya.
“Nga lah kylli na ki (Nongkhaïi bad nongdie dohka) ba katno sngi kan shim por ia ki trok kiba mih na Karnataka ban pynpoi ïa ki dohkha sha Shillong. Nga lah ong ïa ki ba kan shim por kumba 15 sngi hynrei ki la pynshai ba ka shim por tang 4 sngi. Kane ka dei kaei kaei kaba ngan tip bniah bha, kumta ki Food Safety Inspector ki dei kiba biang tam ban leh ïa katei” ong ka Kong Ampareen.
Kala ong ba ka sorkar kala bthah ïa ki ba kin shim khia thikna ïa kane ka kam bad ban kin leh ïa kaba donkam ha ka jingtohkit ka jongki ban lap, khamtam haba ki la kam ba ka shim por tang 4 sngi bad wat hapoh 4 sngi ruh ka jinglong jingman jong ka dohkha ka long kaba lyngkot bha. Kumno ka dohkha ka ïai bteng ban i kum kaba dang bha wat ka la don bun sngi kadei ka jingkylli kaba eh bha.
Ka la kyntu ïa ki paidbah ba ki dei ban bam ïa ki dohkha kiba pynmih hi na ka jylla bad ki dei ban long kiba husiar ban bam ïa ki dohkha kiba wanrah na ka lynti kaba jngai bah.