“Lada aiti sha ka CBI ka biang,” ong ka KSU halor ka jingshah siat ïap ki 5 ngut ha Mukroh

Shillong, Naiwieng 22: Ka Khasi Student’s Union (KSU) ka la pynpaw ba ka pdiang ïa ka jingshim rai ka Sorkar Assam bad ka Sorkar Meghalaya ban aiti ïa ka jingtohkit sha ka Central Bureau of Investigation (CBI) halor ka jingshah siat ïap ki san ngut ki Khasi-Pnar ha ka shnong Mukroh ha ka 22 tarik, Naiwieng, 2022 kaba la dap shisnem pura mynta ka sngi Balang.
Ka Sorkar Assam bad ka Sorkar Meghalaya ha ka 30 tarik u Nailur, 2023 ki la rai ban aiti ïa ka jingtohkit ïa ka jingjia ha Mukroh sha ka Central Bureau of Investigation (CBI). Ïa ki Judicial Commission ba la thaw da ki ar tylli ki Sorkar Jylla ban tohkit halor kane ka jingjia la pynkut noh shisyndon hadien ba u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Meghalaya u Conrad K. Sangma ki la ïakynduh ban ïakren ïa pynbeit ïa u pud u sam ha Khanapara.
“Lada ki aiti sha ka CBI ruh ka biang, tangba ka jingtohkit ka dei ban long kaba khuid.  Ym tang katta, tangba ngi hap ban sngewthuh ruh ynda ladep ka jingtohkit, jop mano mano ruh ngim tip hynrei ïoh ki briew jong ngi ha khappud kin dang shah pyndik.  Kaba donkam eh ka long ba ngin don ïa ki Pulit ki ban ïada ïa ki briew (jong ngi) ha khappud bad ki Pulit ruh kim dei ban shu ieng ha khapud ba shu peitkai ïa ka jingshah thombor jong ki paradoh parasnam jong ngi hynrei ki hap ban ïakhun,”  la ong u samla Donal V. Thabah ha ka jingïakren bad u nongthoh khubor ha ka sngi Balang.
“Lada ka Nagaland ka lah, lada ka Mizoram ka lah, ka jylla jong ngi ruh ka dei ban lah,” la ïaiban u samla Thabah.
“Mynshem snem haba ngi pynlong ïa ki jingïakhih, ki don ki jingpyntieng kohtympan ba kin khang ïa ka Petrol, kin khang noh ïa u khaw bad lada ngi tieng noh ïa kata, na ka por sha ka por ngin shah pynïap. Lashai lada ki (Assam) lah ïoh ïa ka Mukroh kin nang kyntur bad lashai baroh kawei ka jylla kan hap biang sha kaAssam. Ngin hap ban pyrkhat bad ban puson bha ïa kata. Kaba kongsan eh ka dei ka jingshngaiñ bad ka jingïada ïa ki paradoh parasnam kiba sah ha khappud bad ka jylla Assam bad kumjuh ruh kiba sah ha khappud jong ka ri Bangladesh,” u la ong.
Haba kylli, u General Secretary ka KSU u la ong, “ka jingshongshngaiñ hi kam don, teng teng ka wan, teng teng ka leit.  Ki jong ngi lei ki ïaid la ka jong ka lynti ki trei ki ktah hynrei dei kitei (Karbi) na sha shilinag (Assam) kiba pyndik.  Kumba jia ha Lapangap naduh ka por hyndai hyndai ki (Khasi-Pnar) rep ïa u kba hangto bad ha ka por ba ki dang rep ïa u kba ki (Karbi) shah hynrei ynda la dei ka por ot kim (Karbi) shah. Kaei ka jingthmu, ki thmu ban kurup ei ïa u khaw ba ki la thung shitom da ki briew jong ngi.”
“Ngi hap ban pyrkhat ba kine ki jingshah pyndik ha ki thaiñ khappud, khamtam na Assam ka long kaei kaei kaba ngin shu sngap ngim lah. Na ka por sha ka por ngi la hiar sha khappud ban ïakren bad ngi la pynlong ki jingïalang bad don bynta lang bad ki.  Kaba lah hi ban tehlakam ïa ka jingthombor jong ki lehnoh, ki paidbah bad ki pulit bad Forest Guard (ka Assam) ka dei ka Sorkar Meghalaya,” u la bynrap.
U la ong shuh shuh ba ka jingïapynbeit ïa u pud u sam ka dei ban long ba ki shnong Khasi hi ki dei beit ban hap hapoh ka jylla Meghalaya khang ba ka jingmut jong ka Hill State kan long kaba pura, kaba paka bad kaba jop.