Nongstoiñ, Jymmang 03 : Na ka bynta ban ka jingkhuid jingsuba jong ka shnong ka thaw ka dorbar shnong New Nongstoiñ kan pynlong ïa ka pyntip paitbah ba ha ka sngi ha ka 5 tarik mynta u bnai kaba dei ka sngi hatmajai yn pynlong ïa ka jingpynkhuid shnong ha baroh ki kyntoit jong ka shnong. Katei ka jingpynkhuid shnong kan sdang naduh ka por mynstep kumta la kyntu ïa baroh ki nongshong shnong ,ki nongshong ïew bad ki nongshong wai ba kin ïamih ryntih naduh dang step.
Ha katei ka sngi kan don ruh ka jingïalang kaban sdang ha ka por 10 baje mynstep ha kaba ka Smt Hema Nayak IAS Deputy Commssioner , u bah S.Diengan IFS Divissional Forest Officer West Khasi hills ,u bah S.Rahshir sordar jong ka shnong New Nongstoiñ uba dei ruh u MDC ka Mawshynrut , u bah J.Ïawphniaw MDC ka Nongstoiñ bad u bah Gabriel Wahlang MLA Nongstoiñ kin Ïa don lang. Ka dorbar shnong ka kyntu ruh Ïa baroh ki paitbah ba kin ïatrei lang ha kaban wan rah ïa ka khiid ka suba ha poh ka shnong ka thaw baroh kawei.
