Nongstoiñ Jylliew 30: Ka jingpynrung kyrteng thymmai ïki nongthep vote ha ki lai tylli ki constituency jong ka West Khasi hills district ka la sdang biang naduh kine ki sngi.
Ka Smt Hema Nayak IAS Deputy Commssioner ka West Khasi hills kaba dei ruh ka District Election Officer ha ba ai jingkren ha ki ladpathai khubor ha kamra trei kam jong ka ha kane ka sngi hat majai ka 30 tarik Jylliew ka la ong ba ïa ka jingpynrung kyrteng ïa ki nongthep vote la bthah ïa baroh ki BLO ba kin leit ha man la ki thliew ïng khnang ban pynthikna ïa ka jing don jong ki dkhot kiban sa kynjoh khatphra snem haduh ka 1 tarik jong u bnai Risaw mynta u snem.
Nalor kata ka la ong ruh ba ka jingbthah ïa ki BLO ba kin leit haman la ki thliew ïng ka long ban pynthikna ïa ka jingdon jong ki dkhot hapoh ka long ïng kiba la don kyrteng h ka Electoral roll kiba la khlad noh khnang ba yn lah ban pynshisha da kiba ha ïng ha sem bad ba ka ophis kan ym don jingartatien ban weng weng noh ïa ka kyrteng jong ki.
Ka Smt. Nayak ka la ong ruh ba na ka liang ka ophis jong ka District Election Officer ka la plie ruh ïa ka lad na ka bynta jong kito ki sam la kiban sa kynjoh khatphra snem haduh ka shi tarik u bnai Risaw jong une u snem ba lada ki kwah ban pynrung kyrteng hynrei kim lah ban ïa kynduh ïa ki BLO ki lah ban shu leh da kaba online ruh. Ha kajuh ka por ka Smt Nayak ka la pynshai ba lada ki don kino kino ki nongshong shnong jong kitei ki lai tylli ki constituency ki bym sngewthuh shai ha kaba ïadei bad ka jingpynrung kyrteng thymmai bad ka jing pynbeit ïa ki jingbakla ha kab spel dak ïa ki kyrteng jong ki lah ban wan ïakynduh ïa ki Election Officer lane ki Assistant Election Officer jong ki constituency jong ki bad ba kin pyndap ïa ki kyrteng jong ki ha ki phom 6 kumba la ju leh naduh ba sdang. Khatduh eh ka la kyrpad ïa baroh ki long ïng hapoh ka district bad ki nongsynshar shnong ba kin ai ka jingïatreilang khnang ba ka kam kan long kaba seisoh.
