Jowai, K’Lyngkot 25: Ka ophis jong U Sub-Divisional Officer (Election), Amlarem Sub-Division, Amlarem, mynta ka sngi 25 tarik u kyllalyngkot 2024, ka la rakhe ïa ka “14 th National Voters Day” halor ka theme “Nothing like voting, I vote for sure”, ha kaba u Dr. Abhiskek Saini, IAS, SDO (Election) u la long u Kongsan ha kane ka programme.
Ïa kane ka programme la pynïaid da u Shri G.L.C Mylliem, MCS, Asst. Commissioner bad ula ai ruh iaka jingkrenpdiang bad jingai khublei ïa baroh kiba ïadon lang ha kane ka programme.
Ha kaba sdang jong ka programme la ai jingkren da u M. Sangma, BLO Supervisor. Ha ka jingkren jong u, la ong ba da kum ki BLOs ki la pyrchang katba lah ban leit sha ki shnong bad ki ïing ki sem jong ki nongthep vote ban pynsngewthuh ïa ki shaphang ka jingthep vote bad ka rukom thep vote khamtam ïa kito kiba dang thymmai.
La ai jinghikai bad pynshai shaphang ka EVM machines bad shaphang ka Vote from Home. U la kyntu ia ki rangbah shnong, ki rangbah ñiam ba kim dei ban leh shongshit ne ïashah liang ha ka por Election namar kane kan ktah ïaka shongsuk shongsaiñ ha ki shnong ki thaw.
U ma Luckystar Pamthied, President of Association of Challenged People, Amlarem Block, ula ai jingkren ha ka ba ula ïaroh bad ai khublei ïa ka Sorkar ïa ka jinghikai ba kala ai na ka bynta ki ba duna ka dkhotmet da kaba wanrah ïa ka Vote from Home kaba la ïarap bad pyllah ïa kiba kin pyndep ïa ka hok ban vote bad ban jied ïa ki nongmihkhmat.
U Kongsan haba ai jingkren ula ai khublei National Voters Day ïa baroh. U la ong ruh ba la rakhe ïa kane ka sngi manla u snem kum ka foundation day jong ka Election Commission. U la kyntu ïa baroh ki nongshong shnong kiba la dap 18 snem shaneng ba kin kheiñ kordor ïa ka vote jong ki, la ha kano kano ka ñiam ka jait ka rukom im ne ka ktien ba ki don.
U la kyntu ban vote katkum ka jingsngewthuh bad ka mon la jong bad ym dei ban ngop ha ka jingkren pynbieit jongkiwei. Ula kyntu ba dei ban don ka mynsiem ban ïarap ban pynsngewthuhlem ïa kiwei ki bym sngewthuh khamtam ïa kito ki bym lah ban leit sha ki jaka thep vote, namar mynta ka sorkar ka la pynbiang ïa ki machines ba kin lah ban thep vote na ïing.
Ha kane ka programme la sam ïa ki EPICs sha ki nongthep vote ki ba thymmai, la pule ïaka Voters Pledge ha ka jingïalam ka F.M. War, ASE. La pynkupburom ïa ki BLOs ma Dapki Shylla, BLO-4-Iongnoh, ma Savio Myrchiang, 21-Amlarem A bad u ma Jacinthson Passah, 23- Pdengkarong, naka bynta ka jingtrei shitom jong ki.
La sam ruh ïa ki khusnam sha ki nongjop ha ka ‘Painting Competition’ ba la long ha ka 23 tarik January 2024 bad ïa ka ‘Run For Democracy’ kaba la long ha ka 24 tarik January 2024. La pynkut ïaka jingïalang ha kaba u ma J. Tongper ula ai ïa ka jingkren ai khublei.
