La pynwandur ïa ka GTUWSS ban ïarap ïa ka jingkyrduh um hapoh u snem 2055: Myntri PHE

Shillong, Lber 08 : U Myntri ka tnat PHE u Marcuise N Marak ha ka sngi Thohdieng u la pyntip ba ïa ka Greater Tura Urban Water Supply Scheme (GTUWSS) la pynwandur ban kynduh ïa ka jingeh kaba duna um kaba long 30 million litres ha ka sngi sngi (MLD) la kumno kumno hapoh u snem 2055 bad ïa ka New Shillong Water Supply Scheme (Phase-I) ka dei kaba hap ban pyndap ïa ka jingdonkam ka umbam umdih kaba kot sha ka 70 MLD hapoh u snem 2057.
Haba jubab ïa ka cut motion hapoh ka Dorbar Mang tyngka u Marak u la ong ba ka Greater Tura Urban Water Supply Scheme la dep ïoh ka jingmynjur ha ka 31 tarik u Kyllalyngkot, 2025 bad ka jingmang ka long T. 398.48 klur.
Kane ka dei ka pumping scheme bad ka tyllong jong ka um ka dei na ka wah Ganol ha kaba kane ka wah ka la ring tyrkhong bad kaba dang lah ban sam um kumba 195.42 MLD, u la ong da kaba bynrap, “Kane ka skhim ka dei ka ban ïarap ïa ka jingdonkam um jong kumba 2,69,763 ngut ki nongshong shnong kiba donkam haduh 30 MLD ha ka snem 2055 ha kaba kane kan ai ka jingmyntoi ïa baroh ki nongshong shnong jong ka sor Tura kaba kynthup ruh ïa baroh ki jaka pule kiba don ha sawdong ka Tura.”
U Myntri u la pyntip ruh ba ïa ka New Shillong Water Supply Scheme (Phase-I) la dep ban mynjur ïa ka mang tyngka ha ka 15 tarik u Lber, 2024 kaba la kot sha ka jingdonkam ban pynlut kaba long T. 538.44 klur kaba dei napoh ka State Plan.
Ïa ka kam Engineering, Procurement & Construction (EPC) contract la aiti sha M/s BAC Infratech Private Limited ha ka 26 tarik u bnai Jylliew, 2024 lyngba ka open tender bad la buh pat ïa ka por ban pyndep hapoh ka 2 snem.
Ka tyllong ba la sam napoh ka wah Umkhen ka la sdang ring tyrkhong na ka daw ka jingrkhiang ka suiñbneng kaba long 123.16 Mld. Kane ka project la pynwandur ban sam um sha ka New Shillong Township bad ki 32 tylli ki shnong kiba marjan.
“Kane kan sam ïa ka umbam sha ki 4.14 lak ngut ki nongshong shnong kaba la kot sha ka 70 million MLD ka umbam umdih hapoh ka snem 2057 kata ka mut hadien ka 30 snem,” ïathuh u Myntri Sorkar.