La pynskhem pura ïaki nongïalam ba thymmai ka CoRP Central Zone

Nongpoh, Nailar 21: Ki nongïalam jong ka Confederation of Ri-Bhoi People (CoRP), haka jing pynskhem ïaki nongkitkam ba thymmai jong ka Central Zone mynta ka sngi ha Umsning Auditorium, kila kyrshan tyngeh ïaka jingpyrshah ïaka ktem khalai ha Ri-Bhoi (Casino), ka bym don jingmut eiei ruh em bad kaba wanrah tang ki jingsniew bad ki kam khalai kiba ym lah ban pdiang haka imlang ka sahlang.
Ha katei ka jingpynskhem ïa ki nongkitkam ba thymmai jong ka CoRP Central Zone la sakhi ruh da ka jingdonlang u Bah BB Makdoh Chairman ka Synjuk ki Rangbah SHnong kum u kongsan, ba dei ruh uwei naki nongïalam barim bad ba radbah jong ka RBYF, u Bah Bandari Ryntathiang President ka CoRP, u Bah Gershom Hat Vice President bad kiwei kiwei ki nongialam ka seng.
Haba kren ha katei ka sngi naka liang kitei ki nongïalam ka CoRP kila kren shai ba kin pyrshah beit iaka ktem khalai ba kam dei ban ieng ha Ri-Bhoi la ka long ha kano kano ka rukom kumba naka liang ka Synjuk ki Rangbah Shnong bad KSU kila pyrshah ba kim lah ban pdiang ia katei ka ktem khalai.
U Bah BB Makdoh kum u wei naki nongialam barim ka RBYF ba long ruh kum u Chairman ka Synjuk ki Rangbah Shnong u la ai mynsiem ia kitei ki nongialam ba thymmai jong ka CoRP Central Zone ba kin long ki nuksa sha ki khun samla ban trei naka bynta ka bha ka miat haka imlang ka sahlang ym ban shim kabu ha kyrteng jong ka seng naka bynta ka jingmyntoi shimet namar ki don ki samla kiba ju rung seng bhalang tang namar ba ki don daw badno badno.
Ki nongialam ba thymmai jong ka CoRP Central Zone ki kynthup ia u Samla Shining Kyntla kum u President, Winson Laloo kum u Vice President, Moris Lyngdoh General Secretary bad kiwei kiwei bala pynskhem da u President ba rangbah ka seng u Bah Bandari Ryntathiang.