La pynlong ïa ka ‘Block Level Workshop’ ban kyntiew ïa ka rukom treikam ha ki bynta bapher bapher

By Mawphor News Desk On Nov 9, 2022

Mawkyrwat, ‘Naiwieng 08: Ka Meghalaya State Skill Development Society (MSSDA) jong ka Labour Department ka Sorkar Meghalaya ha ryngkat ka jingïatreilang bad ka District Administration, District Skills Committee, South West Khasi Hills District lyngba ka jingkyrshan jong ka Deen Dayal Upadhyaya Grameen Kaushalya Yojana (DDU-GKY) ki la ïoh ban pynlong ïa ka prokram ai jinghikai halor ka kumno ban kyntiew ïa ka rukom treikam la ka long ha ka kam rep kam riang ne wat ha ki rukom ban sdang ban trei ïa ki kam la jong bad lyngba ki lad jingshah hikai bapher bapher na ka Sorkar ha shnong Madan, South West Khasi Hills District.
Ha kane ka prokram la ïoh ban ïadonlang naduh u bah Allfond Kharsyntiew, Secretary ka Hill Farmers Union (HFU) jong ka Central Body kum u kongsan, u bah Lister Warjri, District Project Manager ka DDU-GKY, Mawkyrwat Block lem bad kiwei de kiba la shah khot sngewbha kiba dei na ki tnad treikam jong ka sorkar naduh ka Basin Development Prime Project, Mawkyrwat, Skill Development Office, Adhaar kiba la wan ban ai jingpynshai ha kane ka sngi.
U bah Allfond Kharsyntiew, General Secretary ka Hill Farmers Union (HFU) Central Body kum u kongsan haba kren ha ka jingïalang u la pynpaw ka jingsngewkmen ban ïoh ban ïadonbynta ha kane kaba kum kane ka jingïalang ba ïadon ne ïatreilang bad ki tnad treikam jong ki ophis sorkar ka South West Khasi Hills District kiba la long ka jingaimynsiem bad jingkyrshan lyngba ki jingpynshai ha ki paidbah nongrep halor bun ki mat treikam ba ki paidbah nongrep ki dei ban tip.
U bah Allfond u la ong ba kum ki nongïalam jong ka HFU u la ong ruh ba mynta ki don hapdeng ka jingïaksaid kumno ban wanrah ki jingkylla ha kiba bun ki liang bad kumno ban wanrah ruh ïa ki kam ki jam ha ki khun samla lyngba ka rep ka riang. U la pynshai shuh shuh ba ha kaba ïa dei bad ki mar rep kiba bun, kum ki nongrep kim dei ban shu pynleh noh ei kai hynrei ki dei ban wad ki lad ki lynti kumno ban pynïaid ïew, da kaba u la ai nuksa kum u sohmrit khlaw ba kim dei ban shu die kumto ha ki kilo bapher bapher hynrei ki dei ban tip ruh ba na une u mar rep lah ban shna ki kynja dawai kiba khlaiñ bor ban pynjem ïa ki jingpang. Namarkata, ka HFU kum shibynta ban pynshlur ïa ki nongrep lyngba u sohmrit khlaw ka la dep ban thoh sha ka ‘State Medicinal Plan Board’ ba ka dei ban pynshlur ïa ki nongrep ban ki rep kham bun ne kham pynheh ïa ka jingrep ïa u sohmrit khlaw da kaba u la ai nuksa ba hapoh Mawsynram, Pynursla bad kiwei de ki jaka ba ha kine ki sngi ki la sdang ban pynkharoi kham bun ban ïa kaba ki ju rep man ka por.
U bah Allfond u la kren ruh khyndiat shaphang ka jingpynïaid ïew ïa u synsar ba katno ngut napdeng ki nongrep kiba tip ban pynïaid ïew ïa u, namar kumba la tip ba bun ki thaiñ war ki ju long ki nongpynmih bun bha ïa u synsar hynrei ha kaba ïa dei bad ka dor pat ki long ha la ka jong ka jong, kumta kane ka long kaei kaei kaba pynduh mynsiem bha ïa ki nongrep. Hynrei mynta ka sngi u la wan ban pynshai ba lada baroh ki nongrep ha thaiñ Manad San Shnong Area ki long kiba ïa tylli ki lah ban buh hi ïa ka dor katba kum ka jinglah jong ki, ym ba kiba wan thied kin buh dor ïa u mar ba ki nongrep ki la pynmih.
Ha kajuh ka por u la wanrah ruh ka nuksa ba lada ki nongrep ki kwah ban pynïaid ïew ha ka rukom kaba dei ïa synsar ym shuh da kaba die kilo da u jingteh ne jingkhum uba heh hynrei kum u synsar ba la long ban pyndonkam ban sar ïing, u la pyni nuksa ba kawei ka kompani ba dang shu dep pynmih ka ‘BASUBA BROOM’ kompani kaba don hapoh Bhoi, Rymbong Block ka la leh ïa kaba dei eh ban pynïaid ïew ïa u synsar uba la dep thaiñ ha ka dor kaba biang bad ïa une u synsar la dep ruh ban buh ha ka Online lyngba ha ‘Amazon’ ha ka dor kaba T. 280/-.
Kumta u la buh ka jingkyrpad na ka bynta ki paidbah nongrep ba lada ki kwah ban pynïaid ïew ïa u synsar uba ki la dep ban thaiñ ka long kaba suk, nyngkong kin hap ban wad shwa ïa ki lad jinghikai kumno ban thaiñ namar ban shu thaiñ kumba thaiñ manla ka por kam long kaba dei bad lada ki kwah u bah Allfond u kular ban sa phah ïa ki briew ne phah ïa ki nonghikai ban hikai ïa ka rukom ban thaiñ khnang ba un long uba ryntih. “Ha kaba ïa dei bad ka ïew pat, nga ngan sa leh ïa kaba donkam ban pynïarap bad pynïaid ïew ïa ki synsar ba la dep thaiñ”, ong u bah Allfond. U la batai ruh ba ïa u synsar uba la dep thaiñ u dei ban don 250 gram bad ha ka shi kilo u synsar lah ban thaiñ haduh 4 tylli ki synsar ha ka dor kaba katkum ka jingbuh jong ki hi. Namarkata, u la buh ka jingkyrpad na ka bynta ki nongrep ba nangshakhmat ki dei ban long ki briew kiba ïatylli, ïalong kawei ha baroh ki liang khnang ban lah ban kyntiew ïa ka kam rep kam riang kham shajrong.
Katba ha ka jingkren jong u bah Lister Warjri, District Project Manager (DPM) ka DDU-GKY, Mawkyrwat Block u la batai khyndiat shaphang ka jingthmu jong ka DDU-GKY ne ka Deen Dayal Upadhyaya Grameen Kaushalya Yojana kaba peit kyrpang na ka bynta ki khynnah samla shynrang bad kynthei kiba don hapdeng ka karta 18 haduh 35 bad kiba kwah ban trei ha ki jaka bapher bapher lyngba ki lad jingshah hikai ne training ba ki ki la ïoh. “Kane ka DDU-GKY ka peit kyrpang na ka bynta ki khun samla kiba la ieh noh ïa ki jingpule na ka daw jong ka jingbym ïoh lad shuh ban bteng namar ki daw ha ïing ha sem”, ong u bah Warjri.
U la pynshai ruh ba ki lad jinghikai na ka bynta ki samla kiba don jingthmu ban pynrung kyrteng kin sa don shibun bah ki bynta ha kaba ki jinghikai kin long khlem jingsiew, ki uniform, ka bam ka dih, ki jaka sah bad haduh ban da pynïoh ne pynpoi ha ki jaka ba kin leit ban trei ym hapoh ka Jylla Meghalaya hynrei shabar jong ka Jylla bad lada ki khun samla ki kwah ki jingtip kiba kham shai shuh shuh ki lah ban leit mih ha ophis treikam hajan Block Development Office.
Kiwei pat kiba la ai jingpynshai ki long ka kong Merryjane Lyngdoh Maw-long, Central Manager napoh ka Basin Develop-ment Prime Project, Mawkyr-wat, ka kong U. Kharlyng-doh, Skill Development Officer, Meghalaya State Skill Development Society (MSSDA), ka kong Ibarisha Lyngkhoi kaba la pynshai halor ka jingdonkam jong u Adhaar Number bad hadien kane la pynbud sa ka jing-pynrung kyrteng Adhaar haduh 20 tam.