La pynlong ïa ka Anti-Tobacco Awareness Programme ha Sngap Syiem College, Mawkyrwat

Mawkyrwat, Jymmang 19: Ka ToFEI Cell jong ka Sngap Syiem College ha ryngkat ka jingïatreilang bad ki bynta jong ka National Service Scheme (NSS) bad National Cadet Corps (NCC), ki la pynlong ïa ka Anti-Tobacco Awareness Programme ban pynsngewthuh ïa ki samla pule bad ïa ki paidbah nongshong shnong halor ki jingma kiba mih na ka jingdih bad pyndonkam duma, kumjuh ruh ban kyntiew ïa ka jingim kaba lait na u duma.
Ïa ka programme la sdang da ka jingai jingkren na u Babu T. Lyngdoh jong ka Department of Economics, uba la ban jur halor ki jingma kiba khraw ïa ka koit ka khiah kiba mih na ka jingpyndonkam duma bad ula pynpaw ruh ïa ka jingdonkam jong ka jingïatreilang ban tei ïa ka imlang sahlang kaba koit ba khiah.
Kum shibynta jong ka program, ki samla pule bad ki nonghikai ki la shim ïa ka jingïasmai paidbah ban kular ne shim ïa ka pledge ba kin kiar na ka jingpyndonkam ïa u duma bad ban pynsngew paidbah halor ki jingma jong ka.
Hadien kane, la pynlong ïa ka rally paidbah kaba la shimbynta shitrhem da ki samla pule, ki volunteer jong ka NSS bad NCC, ryngkat bad ki nonghikai. Ïa katei ka rally la plie paidbah da u Dr. K.K. Nongsiej u Principal jong ka Sngap Syiem College, Mawkyrwat ha ryngkat ka jingdonlang ki nonghikai bad ki samla pule.
Kiba la ïashimbynta ha ka rally ki la rah ïa ki placard ryngkat ka jingpyrta ïa ki slogan ban pynsngewthuh halor ki jingma jong u duma bad kyntu ïa ki paidbah ban im ïa ka jingim kaba koit ba khiah bad kaba lait na u duma.
Ha kane ka sngi la pynlong ruh ïa ka signature campaign ha kaba ki nongshimbynta ki la ai ïa ka jingkyrshan jong ki ban wanrah ïa ka imlang sahlang kaba koit ba khiah ha kaba la ïoh ïa ka jingïashim bynta kaba shitrhem da ki samla pule bad ki nonghikai.