Yn khmih bniah u Myntri sorkar pdeng ïa ki jingeh ki nongkhaïi ha khappud India-Bangladesh

Shillong, Jymmang 19: U President ka BJP Meghalaya State u Rikman G Momin u la leit ban ïalam ïa ka kynhun kiba mihkhmat jong ka Federation of Licensed Exporters of Meghalaya (FeLEMA) ban kynduh ïa u Myntri ka sorkar pdeng uba khmih ïa ka Commerce & Industries u Piyush Goyal.
Ha kane ka jingïakynduh ki la pynlong ka jingïasyllok kaba jylliew bad u Myntri halor kiba bun ki mat kiba kynthup ïa ka kam khaïi ha khappud kiba la shah khang hapdeng ka India bad Bangladesh lyngba ka jylla Meghalaya.
Ka Federation ka kyntu ïa ka jingtuklar jong ka sorkar pdeng bad ban ïarap ban pynsuk ïa kane ka kam khaïi ha ka thaiñ khappud kaba la sangeh ha kine ki por ba la leit. Na ka liang u Myntri ka sorkar pdeng u la pynthikna ïa katei ka kynhun ba un khmih ïa kane ka kam bad pynthikna ruh ba kan don ka jingpynsuk ban leh ki kam khaïi bad ba kane ka jingslem kam dei ban ktah ïa ka jingduh ka khajna na ka bynta ka kynhun ki nongshalan kiba na Meghalaya.
Ki la ïathuh ba kum ki nongkhaïi ba shalan mar ki ïai bteng ban mad ïa kine ki jingeh ban phah ïa ki tiar jong ki bad kam don satia ka jingrung jingmih kaba biang bad kaba la wan lang pat bad ka jingshah khang jong ki ïew ha khappud. Ka jingduna ka jingïatreilang bad ki bor ba dei peit ha LCS ka la long sa kawei pat ka daw kaba wanrah ka jingsngewkhia. Ïa kine baroh la ïakren ha ka jingïakynduh bad u Myntri ka sorkar pdeng.
Na ka liang u Myntri u la bthah ïa u Joint Secretary, Commerce & Industries ban sdang ka jingïakren hapoh ka secretary level bad ban leh noh kham kloi ban pyndep ïa kane ka mat kaba la slem ba la mad da ki nongkhaïi.