Sdang ka Sankardev College ban tih bniah ïa ka jingkharoi bad pynduh jait u drok ha ka jylla

Shillong, Jymmang 19: Kum shibynta jong ka jingïai bteng jong ka Sorkar ïa ka jingangnud ban ratdyngkhong ïa u drok bad ki jingpyndonkam bakla ïa u bad kumjuh ruh ban ïai buddien ïa ka dorkhas ba la ïasoi da ka DREAM Mission ha u nohprah 2025, ka Memorandum of Understanding (MoU) bad ka Sankardev College ban pynlong ki jingjurip, ka jingtih bniah ïa ki jingpyndonkam bakla bad kharoi u drok ha ka jylla, ha ka sngi nyngkong la plie ïa kane ka jingsdang ka jingjurip ban ïoh ki jingkheiñ ïa ki jingdon kiba dih drok bad ïa kane la plie ha Sankardev College ha ka jingdonlang Dr. Eureka FP Lyngdoh, Principal, u Bah K Chyne, Vice Principal, ki nonghikai bad ki nongmihkhmat napoh ka DREAM Mission ha ryngkat lang bad ka Meghalaya User’s Forum (MUF) bad ka Meghalaya Drug Users Network (MeDUNET).
Kane ka jingsdang ka long kaba kyrpang naba ka kynthup ïa ki dkhot ba kin don bynta ban lum jingkheiñ.
Ha kane ka prokram la ïoh ka jingkren na u MD, DREAM, nangta na u Mission Director uba la Ïaroh ïa u Myntri Rangbah ka jylla u Conrad K Sangma uba la wanrah ïa ka jingmut ka DREAM Mission bad kumjuh ruh ïa ka Sankardev College bad ka Ms. E Tariang, Head of Department, Statistics, kaba la ïalam ïa ka jingleh survey bad wad bniah ïa ka jingkharoi jong u drok ha ka jylla.
Kane ka jingjurip la ong ba ka thmu ban lum ïa ki jingkheiñ bad ki jingtip haba ïadei bad ki jingkynrei, ki jinglong jingman bad ki jingktah jong u ne u jait jingdih ha kylleng ka jylla Meghalaya, ha kaba kane yn ïarap lang da ka sorkar ha ka ban thaw ïa ki polisi ban pynkhlaiñ ki lad jingïada, ban ai ki lad jingsumar bad ka jingbuh ïa ki rehabilitation centre.
Kane ka jingleit jurip kan sdang shwa na Shillong kaba dei kum ka pilot project bad suki suki yn sa pynïar sha kiwei pat ki bynta jong ka jylla. Ïa kane yn pynbud pat da ka jingïoh ki jingshisha ki jingshai bad ïa kane la khmih ban sdang noh shen.