Shillong, Jymmang 19: Kum ka jingpyrshang ban kyntiew bad pynsngewthuh paidbah shaphang ka Single Emergency Number ‘112’ hapoh ka Emergency Response Support System (ERSS), ka Ophis jong u District Magistrate, East Khasi Hills District, Meghalaya, ka la kyntu ïa baroh ki Block Development Officers (BDO) kiba don ha ka District ba kin pynlong ïa ka jingpyn sngewthuh paidbah ha la ki jong ki jaka.
Ka Emergency Response Support System ka la ai ïa ki jingshakri kiba lah ban shaniah naduh ba la sdang ïa ka ha u snem 2018.Ha ki snem kiba la leit noh, kane ka jingthmu ka la sdang ïa ka rukom ai jingïarap kyrkieh kaba ïatylli bad kaba mynta ka la treikam pura bad shakri ïa ki nongshong shnong ha kylleng ki jaka bapher bapher.
Ka bor pyniaid district ki la pynpaw ba ka jingjop jong kane ka jingshakri ka shong shibun ha ka jingpynsngewthuh paidbah.Ban pynthikna ba ka jingshakri kan pyndep ia ka jingthmu ba la thmu, ka long kaba donkam ban pynbun ïa ki jingpyrshang ban leit khnang ba uwei pa uwei u nongshong shnong un tip ïa ki jingiarap ba la ai da ka Sorkar lyngba kane ka rukom.
Ïa kane ka jingthmu lah ban pynurlong lyngba ki jingpynbna paidbah bad ka jingialap ne pynsngewthuh paidbah.Haba ki briew kin tip ba ka jingiarap kan long tang da kaba shu phone, ka iarap ban tei ïa ka jingshaniah ha ka ‘112’ bad ka pynshlur ban pyntip ha ka por kaba biang ïa ki jingjia ba kyrkieh.
