La pynkut noh ïa ka prokram Road Safety Week ha EJHD ba la pynlong da ka ophis u DTO

0

Khliehriat Lber 31: Ïa ka prokram Road Safty Week kaba la pynlong mynta baroh shi taïew, ha East Jaiñtia Hills District, la pynkut noh mynta ka sngi,. ïa kane ka prokram la pynlong da ka ophis jong u District Transport Officer East Jaiñtia Hills District, ha Ladrymbai Dongwah, ha ryngkat ka jingïatreilang bad ki bor district, ka tnat Public Works Department, ka tnat pulit lem bad ka tnat ka koit ka khiah.
Haba kren ha ka jingïalang, u District Transport Officer, East Jaiñtia Hills District, u bah R. Hinge, u la ong ba na ka daw ka jingkiew ka jingjia aksident ha ka jylla, ïa kane ka prokram Road Saftty week la leh kyrpang kum ka prokram ban ai jingpynshai sha ki paidbah khamtam sha kiba ñiah kali ban dup wanrah ïa ka jingshngaiñ ha ka leit ka wan ban lait na kano kano ka jingjia ïatyngkhuh kali, ban bud ïa ki aiñ ñiah kali, ban long kiba phikir bha haba ñiah kali, ban nym ñiah stet than ïa ka kali.
U District Transport Officer, u la kyntu ruh ïa kiba ñiah kali kamai ba ki dei ban da pynbiang ïa ki kot kiba donkam, kum ka Driving license, Vehicle Registration Certificate, ka Permit bad ka Fitness Certificate, bad kiwei kiwei ki kot donkam khnang ba kin lait na ka jingshah daiñ kuna bad jingshah pynshitom kaba katkum ka aiñ, u kyntu ruh ïa kito ki nongñiah kali kamai ki bym don ïa ki permit ba kin wan aplai na ophis DTO bad ong ruh ba ka ophis kan shim khia ban peit bad bishar (inspection) ban pynsangeh ïa kito ki kali shimet kiba kamai beaiñ hapoh ka district.
U Sub Inspector, jong ka Lad Rymbai Police Outpost, u bah D.Warjri, u la kren bad pynshai halor ki aiñ ñiah kali, u la bynrap ruh ba ka jingiatyngkhuh kali ka ju jia khah khah ruh dei na ka daw ka jingsniew palat ka surok, ka jingñiah thulmur ki nongñiah kali, ka jingñiah stet palat ïa ka kali, ka jingshim pass klumar (overtaking) “ban lait na ka jingïatyngkhuh kali, ban lait na kano kano ka jingjia ba sngewsih, ban lait ruh na ka jingdheng kali, ki nongñiah kali ki dei ban bud bniah ïa ki aiñ ñiah kali, ki dei ruh ban pynieng ïa ki kali ha ki jaka ba la buh (parking), kumjuh ruh kito kiba ñiah ïa ki ar shaka ki dei ban da phong ïa ki jingda khlieh helmet)..
U Motor Vehicle Inspector, jong ka ophis u District Transport Officer, East Jaiñtia Hills District, u bah H.Dkhar, u la ong ba ki nongñiah kali kamai ki dei kiba ju pynpoi ïa ki mar ki mata jong ki briew ha ki jaka bapher bapher, na kata ka daw ki donkam bha ban bud ïa ki aiñ , ki kyndon ñiah kali “Lada don kano kano ka jingjia ïatyngkhuh kali, u nongñiah kali u dei ban phone kloi kloi ïa ki kali kit nongpang (ambulance) bad rah mar mar ïa kiba mynsaw sha ki jaka ai jingsumar kiba don hajan, dei ruh ban don ka First Aid Kit hapoh kali” u la bynrap.

Leave A Reply

Your email address will not be published.