La plie ïa ka Safe Motherhood Transit Home ban ïada ïa ka jingïap ki longkmie ba kha khun

Shillong, Nailar, 12: U Myntri Rangbah ka Jylla u Conrad K. Sangma ha ka sngi Thohdieng u la plie ïa ka Safe Motherhood Transit Home ha Asanang kaba hap hapoh ka Rongram C&RD Block, West Garo Hills.
Ïa kane ka Transit Home la tei da ka Sorkar lyngba ka song pisa ba la mang na ka Chief Minister’s Safe Motherhood Scheme.
Katkum ka State Health Policy 2021 la shem ba ka jingïap shiteng por jong ki longkmie kiba armet ka dei kaba pynsngewkhia bha ïa ka Sorkar na ka jingïap haduh 248 ngut tang ha u snem 2020-21. Lyngba ka Chief Minister’s Safe Motherhood Scheme (CM-SMS) yn kyrshan ïa kane ka jingthmu na ka bynta ban pynduna ïa ka jingïap ba shiteng por jong ki longkmie kiba kha khun.
Haba kren kum u Kongsan ha kane ka sngi, u Myntri Rangbah u la ong ba ka Sorkar ka la buh hakhmat ïa ka thong ban ai jingsumar ba kyrpang ïa ki longkmie kiba armet lyngba ka MOTHER programme bad lyngba ka Safe Motherhood Scheme yn sa shna kham bun ki jaka kha khun bad ban pynduna ïa ka jingïap jong ki longkmie kiba kha khunlung.
U la pyntip ba kane ka skhim ka don saw bynta, kawei, ban buh ïa ka Transit Home na ka bynta ki longkmie kiba kham shitom jur. Ban ai ïa ki jingbam kiba tei bad ka jaka ba kylluid ïa ki khun jong ki.
Ban pynbiang ïa ka kali ha ka leit ka wan da kaba ïatreilang bad ki nongniah kali na ka bynta ban leit shaw bad ban leit on ïa ki longkmie bad ïa ki bahaing hasem kiba synran sha Hospital.
Ban pynshlur ïa ki kurim lane ïa ki bahaing hasem ba kin synran ïa ki longkmie bad ban don beit ha syndah jong ki, ha kaba ka jingsiew bailutksan kan kot haduh T. 1,000 na ka bynta iwei i briew.
Yn sa ai khusnam ba kyrpang lane ka Best Performing Village ha manla kawei pa kawei ka PHC shi sien ha ka shi snem.
U la ïathuh ba ki don haduh 80 tylli ki PHC kiba ladep shna ïa ki Transit Home hapoh ka Jylla.
Ïa mynta haduh 84 tylli ki PHC kiba la pynbiang ïa ki kali bad haduh 36 klur la mang pisa na ka bynta kane ka skhim daba pyntreikam ruh ïa kwei ki prokram kum ka JSY bad ka JSSK.
Shuh shuh u la pyntip ba ïa kane ka prokram la pyrshang ban ai jingïarap pura na ka bynta ban kyrshan ïa ki longkmie ha ka jylla namarba ka sorkar ka la buh hakhmat ïa ka koit ka khiah jong kawei pa kawei ka longkmie bad iwei pa iwei i khunlung.
U la ong ba ka jingïap jong ki longkmie ba kha khun ka la hiar da 35% ha ki hynriew bnai ba la leit noh haba ïa nujor bad kiwei pat ki snem kiba la leit noh.
“Ka jingïap jong ki khunlung ka long 29 points na ka National Average kaba long 28 na ka bynta u snem 2020-21. Ngi dang ïakhun ban pynhiar na ka National Average,” u la bynrap.