Mawkyrwat, Jymmang, 22: Ka Marbaniang Computer Training, Umkaber ba la pynïaid da ka Destiny Self Help Group ha ka 21 tarik u Jymmang, 2022 ka la pynlong ïa ka jingïalang ban ai syrnod ne certificate ïa ki samla kiba la pyndep ïa ka ‘Short Term Course’ jong ka Computer Basic Training.
Ha katei ka sngi u bah Staising Kharbteng u la long u kongsan bad ha ka jingkren jong u la pynpaw ba ka jingdon kane ka jaka ai jingai jinghikai ka long shisha ka jingkyrkhu ïa ki khun samla ka thaiñ, da kaba kyntu ruh ïa ki ba kin shim ïa ka lad ban wan shah hikai ne training ha kane ka jaka ai jinghikai na bynta ka jingmyntoi ka lawei jong ki, khamtam ba ki ki im ha ka juk jong ka jingkylla ha ka teknologi ha kaba ki jingkylla te kin wan beit bad lada kim pdiang ïa ki jingkylla ka jingduh kan long ïa ki hi.
Shuh shuh u la ai mynsiem ïa ki nongïalam ka Destiny Self Help Group ba ki dei ban kynmaw ba i jingjaw um barit in pynlong ïa ka duriaw bah. Kumta ruh kane ka shlem ai jinghikai jong ki ha kawei ka sngi kan ïeng kum ka nongmuna bakhraw ha ka dong ka thaiñ.
La pynïaid ïa katei ka jingïalang da i samla D. Marbaniang iba long i nonghikai katei ka jaka ai jinghikai bad la ïoh ruh ïa ka jingkren na ka kong B. Marbaniang kaba dei ka President ka Destiny Self Help Group.
