Ka Sorkar MDA hapoh ka jingïalam ka NPP, kala mad ïa ka nem sniew kaba shyrkhei ha kine ki sngi naduh ba ka la bat ïa u lakam synshar hapoh ka jylla na ka jingpaw tyngkreiñ ki jingshah pynjulor ki jingtei ba thymmai ba kynthup naduh ki surok, ki jingkieng, building bad khamtam ka jingjulor noh ka ïing dorbar thaw aiñ kaba thymmai kaba mang ka jinglut kaba 141 klur tyngka kaba don ha Mawdiangdiang kaba dang don hapdeng ka jingpyntrei bad kaba la buh ruh ka thong ban pyndep mynta hi u snem. Kane ka jingtei ka la pra kynsan khlem kano kano ka dak ne khih u jumai kaba pynpaw ka jingbym ler treikam bad trei torti tang ban ïoh ka burom.
Ka sorkar MDA ka la mad shwa nyngkong ïa ka nem sniew ha u 2021 ha kaba ka jingkieng nar ha Dwar Ksuid ne ka Baily Brigde kaba la pra kynsan ha u Ïaïong tang hadien katto katne sngi ba la plie paidbah ïa ka da u Symbud Myntri Rangbah ka jylla Bah Prestone Tynsong ha u Lber. Ym tang shisien hynrei katei ka jingkieng ka la pra arsien ha ka shi snem kata ha u Nohprah 2021 hadien ba ki shaka jong kawei ka trok kit dewbilat kiba la kyrngiom ïa ki langtang siang bad ngam shapoh hapdeng jong katei ka jingkieng.
Tang ha ka sngi bnai, ki jingtei tymmai kiba la sdang tei bad shna hapoh ka jingïalam jong kane ka sorkar MDA ki la paw pyrthei ka jingbym skhem bad ka jinglong torti bad trei sted tang ban dep noh. Ka jingpei bad orpait jong ka building jong ka ISBT kadei kawei na kiba kane ka sorkar ka la shah kynthoh bud pat sa ka jingngam ka jingkieng Shillong Mawlai Bye-Pass kaba la paw tyngkreiñ ka jingtrei torti tang ban dep stet khlem da salia wat lada ki pra noh ruh tang ban ïoh ïa ka burom kampher namar sa tang khyndiat bnai ka sorkar MDA hapoh ka jingïalam ka NPP ka hap ban leit sha ki paidbah ban leit kyrpad ïa ka vote ba kordor jong ki, hynrei lada kam lah ban pynurlong shwa ïa kine kiba ka dei ban pyndep kan buh ïa ki nongïalam jong ka ha ka jingeh kaba khraw ha ka election ban wan. Phewse kine ki long pynban ka jubab na bynta u paidbah ba kidei ban stad bad shemphang bad da puson bad buh ha ki jingduwai naduh mynta ban ym ngop ha ka pisa hynrei ban pynpaw da ki kam khnang ba kine ki lei san snem kin kyndit bynriew.
Katba nang mih ki sngi bad ki bnai, ka sorkar MDA ka la mad ka jingshah kynthoh ha kiba bun balang la ka long na ki kynhun seng saiñ pyrthei, ki seng bhalang, ki riew paidbah haduh ki riew shimet halor ka rukom treikam jong ka. Ym lah ban len ruh ba kane ka sorkar MDA ka dei ka sorkar kaba la shah kynnoh naduh sor haduh nongkyndong ha kaba ïadei bad ka kam khaïi dewïong beaiñ. Ki MLA jongka im im peit peit ki nud ban kren ba da dei ka por long session ne dorbar ki MLA te hap ban sangeh ka khaïi dewiong hynrei tang shu kut ka dorbar la bteng beit. Kane ka pynpaw ba kim salia shuh wat haduh katne la shah kynnoh ruh. Ki la rben thlup la kum ka snieh kuratia. Naduh ki khynnah rit haduh ki rangbah ki ïohi pylleiñ pylleiñ ïa ka jingkhaïi dewiong beaiñ ha ki surok namar ki trok ki ïaid mon khlem jingsalia bad patiaw shuh ïa ki bor ka aiñ.
Ka sorkar MDA ka la shah kynthoh ruh halor ka kam pynbeit pud bad ka Assam kaba la ïasoi ïa ka Memorandum of Understanding (MoU) khlem ka jingïasyllok ne ïamir jingmut shwa bad ki Hima bad ki shnong ka thaiñ khappud. Hynrei kat kum ba lah ban ïohi ha ki khubor ki paidbah wat kat hapdeng jong katei ka jingshim khia jong ka sorkar ruh la kynnoh ba ki dang shah shet kylla hi ha ka sorkar. Ha kawei na ka jingkren la ïohi ba ka sorkar ka la shim da ka rai kaba da kumwei pat kata da kaba bud ïa ka jingsorjamin jong u snem 2011 bad lada ka long kumta ka mut katei ka jingsor jamin jong ka sorkar ka la dep long lypa kaba ka bym ïahap kat kum ka mon jong kito kiba shah ktah ha ka MOU.
