La palat ar taïew ym don Doctor ha Markasa PHC, thylli kreng kreng jingthiah nongpang

0

Nongstoiñ, Risaw, 19: La kumba ar taïew kynthih naduh ba u Doctor ba peit ïa ka Markasa PHC u la mih noh ban leit pyntbit biang ïalade ha ka kam sumar nongpang, hynrei haduh mynta ka sngi ym shym pat la don satia uno uno u Doctor u ba la wan ban shimti ha ka jaka jong u.
Kumta ki nongïalam ka Hynñiewtrep Youth Council Mawthadraishan circle, mynta ka sngi ka 19 tarik Risaw ki la leit ban ïakynduh ïa ka District Medical & Health Officer West Khasi Hills District, ban ai ha ka da ka jingthoh ba kan pynsngew sha ka sorkar ba kan phah Doctor noh kloi katba lah ha katei ka jaka sumar.
U bah Shembor Langrin President ka HYC Mawthadraishan circle haba ïakren bad u nongthoh khubor hadien ba la mih na ka kamra treikam jong ka DM&HO, u la ong ba naduh ba u Doctor um don shuh, ki Nurse bad ki nongtrei ha katei ka PHC haba don kiba pang ba shitom kiba wan, ki phah noh ïa ki ba kin leit sha Mairang Civil Hospital.
U la ong ruh ba kiba bun ki nongshong shnong ha katei ka thaiñ ki dei kiba duk ba jynjar bad haba leit shaduh Mairang, ka jinglut ruh ka la kham bun ha ka jaka ba kin tyngkai na ka bynta ki jinglut jingsep na ka bynta ka ïing ka sem bad ka bai dawai, ki la hap ban pynlut noh ha ka bai kali bad ka bai bam ha lynti kumta ka ktah haduh katta katta ïa ka ïing ka sem jong kiba shitom.
Utei u nongïalam ka seng u la ong ruh ba kiba kham shem jingeh ki dei ki longkmie kiba armet, namar na ki shnong kiba kham jngai kum na Phyllut, Langlew, Marngor bad kiwei kiwei, wat lada ka por ban kha khunlung ka la jan dei ruh kim pat leit sha Hospital. Hynrei ynda la sdang sngewthuh ba la suh la thar, ki sa khreh ban leit bad lada don Doctor ha Markasa PHC ki poi ha ka por ba biang. Hynrei haduh Mairang pat ka la kham shim por bad ka lah ban poi haduh u pud ba ki hap ban kha khunlung ha lynti.
Haba kylli pat ba kaei ka jubab ba ka DM&HO ka ong halor katei ka jingleit ïakynduh jong ki, utei u nongïalam ka seng u la ong ba na ka liang ka DM&HO, ka la kular ba kan sa pyntip sa ki bor ba halor ba kin leh kloi ïa kaba donkam. Ha kajuh ka por u la ong ba na ka liang ki nongïalam ka seng kin sa leit ban ïakynduh ïa u bah Brolding Nongsiej MLA ka Mawthadraishan, ba un pynsngew sha ka sorkar ba ka dei ban pah Doctor noh kloi ha katei ka jaka sumar na ka bynta ka jingmyntoi jong ki paitbah nongshong shnong ka thaiñ.
Ha kajuh ka sngi, ki nongïalam ka seng ki la leit ban ïakynduh ruh ïa u Superintending Engineer ka tnad PWD Western Circle, ban pynkynmaw biang ïa u halor ka jingkyrpad kaba ki la leit buh da ka jingthoh kham mynshuwa, ba un ïarap lem ban mang pisa ha ka ban shan surok na Dommawlieh sha Lawrynjam. Namar haduh mynta ym pat don surok satia hynrei ha katei ka jingleit jong ki, kim shym la ïakynduh namar ba u leit donkam sha kiwei pat ki jaka.
Ha kaba ïadei bad ka jingbym pat don surok na Dommawlieh sha Lawrynjam, u bah Bhakupar Parïong Vice President ka HYC Mawthadraishan, u la ong ba na Dommawlieh sha Lawrynjam ka jngai kumba san kilomitar bad ki khynnah skul naduh Upper Primary haduh Secondary school kiba leit pule sha Parïong, ki hap ban ïaid da ka kjat man ka sngi bad ha ka por lyiur ki shem shitom haduh katta katta. Namar ka don kawei ka wahduid ka bym pat don jingkieng satia bad ha ka por ba jur slap, katei ka wahduid ka heh um bha kumta ban kam sha shilliang ki khynnah ki hap ban ap haduh ba ka um kan da khma rngad.
U la ong ruh ba kiba jynjar palat ki dei kiba pang ba shitom, namar haba ka jingpang ka la jur la hap ban kit da u briew bad ban kit nongpang bad ïaid kjat san kilomitar kam dei kaba suk. U la kyntu ïa ka sorkar ba kan phaikhmat lem sha katei ka shnong khnang ba ki paitbah kin lait na ki jingeh.

Leave A Reply

Your email address will not be published.