Shillong, Jylliew 29 : Na ka jingther jong u lap bah ha kine ki sngi, ka um kala nang kiew ha ka Dam Umiam namar kat haduh mynta ka sngi ka um ka la kiew sha ka 3192.1 phut bad kat haduh ba ka Dam kan dap lut ka um ka dei ban poi sha ka 3220 phut.
Kane ka jingther u lapbah ka la pynkmen ïa ki paid nongshong shnong kiba la mad ïa ki jingeh kiba khraw na ka jinghap ban pynjari ïa ki kynta pynlip bording ne ka load shedding. Namar ba ka la sdang dap ha kine ki ar lai sngi ki bor pynïaid ka MeECL ruh kim shym la pynlip bor ding shuh ha ka por mynsngi ne mynmiet ruh. Kane ka la ai ka jingkyrmen ïa ki paid nongshong shnong ba kin lait noh na ka jingshah pynduh bording kaba haduh 8-10 kynta ha ka shi sngi.
Ha ka jingshisha ha ki bnai ba la dep ka la don ka jingduh jingkyrmen kaba khraw namar ba ka um ha Dam ka la hiar shaba palat ka bym pat ju hiar mynno mynno ruh kumba hiar mynta ka kynti. Hynrei mynta la wan ka jingkyrmen namar ba la wan biang u lapbah ha kane ka jylla.
