Shillong, Jylliew, 29: Uwei u runar uba donkti ban pynpait ïa kiba bun ki ATM da ka jingthmu ban lute pisa, kiba la jia ha ki kynta pynlip bording, u la shah kem ha ki Pulit hadine ba ki la pynlong ïa ka jingtohkit bad ka jingbuddien kaba bniah bha.
Ha u kyrwoh ba la phah da u Superintendent of Police (City) East Khasi Hills, Shillong u Bah Vivek Syiem, u la ïathuh ïa ki Pulit ki la register case saw sien ha Rynjah PS hapoh ka Section 457/380/427/448 IPC, ar tylli ha Madanrting hapoh ka Section 427/380 IPC pule lang bad ka Sec 3(2) (e) PDPP Act bad ar tylli ha Laitumkhrah PS hapoh ka Section 427/380/511 IPC bad 427/380 IPC.
Ka kynhun ki Pulit ka Rynjah PS hapoh ka jingïalam jong ka Deputy Superintendent of Police (L&O) ka Kong Jyoti Wahlang, bad u Additional Superintendent of Police u Dewansh Pandey, ki la ïohkem ïa uwei briew uba la 29 snem ka rta uba donkti ha kane ka kam.
Ha ka jingtohkit u la phla ba u la leh ïa kane ka kam runar ban pynpait ïa ki ATM ha Madanrting, Laitumkhrah, Rynjah bad ha Laban. Na ka met jong u ki Pulit ki la ïoh kurup ïa ki jaiñ phong, ka pla, ka shatri ba u la pyndonkam ha kaba leh ïa ka kam bymman. Ka jingjulor na ka jingshah pynpait ki ATM ka la kot palat T.10 lak.
Ïa une u runar la kem nyngkong eh ha kaba ïadei bad ka Madanrting PS Case No. 60(6)2023 U/S 427/380 IPC pule lang Sec 3(2) (e) PDPP Act bad hadien kane la tian ïa u ha Kashari.
Ka jingtohkit halor kane ka jingjia ka dang ïaid shakhmat ban lap dien ïa kiwei pat kiba donkti lang bad u ban kyndang ïa ki ATM ha kylleng ka nongbah Shillong.
