Kyrshan ka NEHUSU ïa ka jingïakhih ki samla pule ha Delhi dawa hiar shuki ïa u Myntri ka tnad pule puthi ka Sorkar Pdeng

Shillong, Naitung 24 : Ka North-Eastern Hill University Students’ Union (NEHUSU) ha ka Sngi Palei ka la mih shakhmat ban ai jingkyrshan ïa u Sonam Wangchuk bad ïa ki samla pule ha kylleng jong ka ri India kiba ïakhih halor ka jinglait tuh jong ki jingkylli ka eksamin NEET bad ka dawa ba u Myntri ka Sorkar Pdeng uba khmih ïa ka pule puthi u Dharmendra Pradhan udei ban hiar shuki noh.
Ha ka kyrwoh, ka NEHUSU ka la ong ba ka jinglait tuh ki jingkylli ka la pynduh jingshaniah ïa ka rukom pynïaid ïa ki eksamin ha ka ri bad buh ha ka jingeh kaba khraw ïa ki samla pule na kane ka rukom treikam ka bym larkam.
“Man la ki Competitive Examination ki pyni ïa ka jingtrei shitom kaba baroh shisnem, ka duh thiah duh dem, ka jinglen ha kaba ïadei bad ka liang ka pisa ka tyngka bad ka jingangnud jong kiba bun bah ki samla kaba ym lah ñiew shuh. Hynrei haba ka rukom treikam ka pulom, kin dei beit ki samla pule ki ban shah ieh ban mad ïa ka jingeh” la ong ka Union.
Ka NEHUSU ka la pynrem jur ruh ïa ki khubor kiba la saphriang halor ka jingpyndonkam ki pulit da ka bor pyrshah ïa kiba pynlong ïa ka jingïakhih kaba jai jai.
“Kaba kham sngew sheptieng ka dei halor ki khubor ba ki sama kiba ïakhih da kaba jai jai, ki la shah bom shah tied bad shah kem haba ki dang ïashim bynta ban pyndonkam ïa ka hok paidbah ban dawa ïa ka hok. Ha ka kam synshar paidbah, dei ban sngap ïa ki samla pule ym ban pynsngap jar” la ong ha ka kyrwoh bad ka ong, kum katei ka jingleh kam don jaka hapoh ka ri kaba la tei da ki nongrim kiba kordor ha ka riti synshar ka ri.
Ka Union kala buh jingkylli haduh katno ki samla pule kin bteng ban mad ïa ki jingeh jong ki jingdkoh ïa kaba kam dei satia kano kano ka jingkit khlieh ka jongki.
“Sa katno ngut ki samla kin hap ban siew ïa ka kuna na ka jingpulom ïa kaba kim shim la thaw satia ma ki” ka la buh jingkylli.
Ka la dawa ba dei ban shim ïa ka jingkit khlieh da ki bor kiba halor eh, ka NEHUSU ka la kyntu ïa u Myntri ka Sorkar Pdeng uba khmih ïa ka pule puthi ba u dei ban shim ïa ka jingkit khlieh bad ban hiar shuki noh.
“Ban wanrah biang ïa ka jingshaniah ki paidbah ha ka rukom long bad rukom pynïaid ïa ka pule puthi ha ka ri, dei ban sdang da kaba shim ïa ka jingkitkhlieh, ym da ki jingai jingkular” la ong ka Union.
Ka NEHUSU ka la ong shuh shuh, ba ki samla pule kim shym la wad ïa ka jingsngewlem ne jingsngew synei hynrei ki dawa ïa ka hok, ka jingbym shah liang bad ka jinglong khuid long suba ha ka rukom treikam ha ka liang ka pule puthi.
“Ngi ïengskhem bad u Sonam Wangchuk bad baroh ki samla pule kiba ïakhun ban ai ka jingïada ïa ka pule puthi, ka jingpynneh ïa ka jingdon ïa ka rukom treikam kaba khuid ba suba bad ka jingdon ïa ka jingkitkhlieh kaba ym dei satia ban ïapein noh” la ong ha ka kyrwoh.