Kyrshan ka JSU ïa ka jingïakhih ka JHTOA ban kyntiew ïa ka bai kit na ki Karkhana

Jowai, Risaw, 07: Ka Jaiñtia Student Union (JSU) Seng kmie ka ai ka jingkyrshan pura halor ka jingïakhih bala pynlong da ka JHTOA naduh ka 5 tarik mynta u bnai, na ka daw ba shah ñiewbeiñ ki trai ri trai muluk haki karkhana shna cement.
Ka seng ha ki snem ba lah dep ka lah juh don bynta lang ban ai ka jingkyrshan ha ki jingïakhih bala khot pynlong da ka JHTOA halor ban pynkiew ïa ka bai kit na ki karkhana shna cement ba kin ai noh da ka bai kit thymmai katkum ka Notification bala ai da ka Sorkar jylla.
Hynrei mynta pat kaba phylla ka long ba kitei ki karkhana ki pynduh wat ban ai load ïa ki kali ki trai ri. Kane ka jingleh heh jong ki karkhana ka la pyndom ïa ki trai ri trai muluk kiba dei ki trai bad ki nongñiah trok.
Ka seng kala maham tyngeh ïa ki karkhana shna cement ba ki dei ban ai load ïa ki kali jong ki trai ri katkum ka soskular kaba ki la soi bad ka Association bad ban burom ruh ïa ki trai ri trai muluk khlem da ñion beiñ ïaka dor .
La pynsngew ba ka seng kan ïaid da ka lynti ba tyngeh lada kitei ki karkhana kim pdiang ïa ki jingdawa kaba shong ñia jong ka Association. Ong u Publicity Secretary ka seng u Samla Dapmain Suchiang ha ka kyrwoh ba ka phah.