Shillong, Naitung 02: U Member ka Parliament ka Voice of the People Party (VPP) na Shillong u Dr Ricky AJ Syngkon, ula kyntu bad kyrpad ïa ka Sorkar Pdeng ba kan tuklar lem noh ban shna pynbha noh ïa ka National Highway-06 ha Meghalaya bad kiwei ruh ki surok ha ka jylla.
Haba aiti ïa ka dorkhas sha u Myntri ka Road Transport & Highway Nitin Jairam Gadkari ha ka 1 tarik Naitung, u Dr Syngkon ula ong, “Nga kyrpad ïa ka ophis jong phi ban sngewbha tuklar bad shim mardor ïa ki sienjam ba donkam halor kane ka kam khnang ba kan weng ïa ka jingeh jong ki paidbah ka Jylla ba la kdew haneng”.
U MP ula ong ba ka NH-06 ka dei ka surok ba kongsan bha kaba ïaid lyngba ka Jylla Meghalaya, Assam, Tripura bad Mizoram kumta ka la donkam ban pynbha noh ïa ka.
Ka surok NH-06 ka pynïasoh ïa ki Sor kiba kongsan ha kine ki 4 tylli ki Jylla ba kynthup ïa ka Jorabat, Shillong, Jowai, Silchar, Aizawl, Agartala bad kut hajan ka khappud India-Myanmar.
U Dr Syngkon ula ong ba ki bynta jong ka surok kiba hab hapoh ka East Jaiñtia Hills District ka dei kaba la jot rathai bha khamtam ha ki bynta naduh Jowai haduh Ratacherra ha kaba ki nongleit nongwan ki hap ban mad ïa ka jingsohsat tang na ka jingsniew ka surok.
“Ka jinglong jingman ka la nang sniew shuh shuh ha ka por lyiur bad ki briew ki ju sahkut da ki sngi ha surok ban poi sha ka jaka ba ki thmu ban leit. Kane ka la ïaid la katto katne snem bad ka la wanrah ïa ki jingeh ba khraw na ka jingduh kamai kajih bad wat ka jingduh ki mynsiem briew,” ula ong.
