Shillong, Lber, 03: Ka Assam Tribal Christian Coordination Committee (ATCCC) ka kyrpad ïa ka sorkar Assam ban khmihbniah biang ïa ka jingmut jong ka aiñ pynkoit da ki bor Jadu ne ka “The Assam Healing (Prevention of Evil) Practices Bill, 2024”, kaba la wanrah hapoh ka Ïingdorbar Thaw Aiñ ka Assam Legislative Assembly ha ka 21 tarik u Rymphang, 2024 da u Myntri ka Parliamentary Affairs jong ka sorkar u Pijus Hazarika ha jaka jong u Myntri Rangbah ka Assam u Dr. Himanta Biswa Sarma.
Na ka jingsngewthuh jong ki kynhun Khristan jong ka jylla ki la shem bad pynpaw halor ïa jinglah ban shaniah bad ka mynsiem jong ka Bill. La don ka jingsngew ba lada la ïoh ka jingmynjur ha kane ka rukom thaw bad ka jingmut ba la pynpaw da u Myntri Rangbah ha ki lad pathai khubor hadien ka jingïalang ka kynhun Myntri ha ka 10 tarik u Rymphang, ki kyntien jong ka ki lah ban ïalam bakla bad batai bakla ban pynkit ïa ka jingban khia ban pynbor halor ki riewngeit Khristan bad kiwei pat ki jaitbynriew ba tlot bor jong ka imlang sahlang.
Na ka liang ka ATCCC ka la ong ba ïa ka jingmut dei ban pynkylla bad ym dei ban pynïakhleh lang bad ki ktien kum ka jingpynkoit bor Jadu ne kum ki ktien “magic healing” lane “magical healing” hynrei dei ban pynrung da ka ktien ka jingthmu ban pynkylla ïa ka niam ki briew ne proselytization’ lane ‘conversion’ bad kiwei kiwei.
Ka seng ka la ong ba ki Balang Khristan barabor ki mut ban ai ki jinghikai jong U Jisu Khrist da ka mynsiem ka jingieid bad ban burom ïa kiwei.
Ka la ong ba ka Balang ka ngeit ba kine ki jinghikai jong u Trai Jisu Khrist ki long kiba bha bad kiba ïarap ban tei ïa ka longïing kaba bha, ka imlang sahlang kaba Koit ka Khiah bad ban pynthikna ïa ka suk ka saiñ bad Ïalong shipara bad ka roi ka san ha ka ri bad pyrthei baroh kawei.
“Katto katne na ki jinghikai ha ka akor ka burom ki kynthup ba phim dei ban thok, bym dei ban tuh, bym dei ban klim, ym dei ban ïa huri hura, ym dei ban ïashoh ne ïakhun, ym dei ban pynïap, ym dei ban leh ki kam pynmynsaw, ym dei ban khwan lalot, hynrei ban ieid iwei ïa iwei, ieid ïa ki para marjan, ieid ïa ki kmie ki kpa, ïa ieid shi para, ban long kiba sngewrit, ban ieid bad ïarap ïa kiba duk bad kiba jynjar, ban wanrah jingsuk ha ka imlang sahlang bad ka ri bad ban im ha ka suk ka saiñ bad kiwei,” ong ka ATCCC.
Ka la ong ba ki riewngeit ha ki Balang barabor ki duwai ha U Blei na ka bynta ka bha ka miat kiba tlot ka ïoh ka kot, kiba pang bad kiba la ha tmier jingïap, kiba pait dohnud, kiba shah khñiot beiñ bad ban ïada ïa ka mynsiem jong ki, hynrei ki Balang Khristan kim ju pynbor ne kyrpad ïa ki briew ban kylla niam ne kylla na ka niam jong ki.
“Hapoh ka Article 25 jong ka riti synshar ka Ri India ka la batai shai ne pynthikna ba ka kam mynsiem ne ka jingngeit niam la ong ba ka dei ka kam shimet da ka jingsngewthuh nalade shimet. Kadei kawei na ki hok ka nongrim jong manla uwei pa uwei u nongshong shnong ka India. Ka la kdew ba ka jingpynphriang kam dei ka jingpynkylla niam. Ka riti synshar ka Ri ka la ai ïa ka hok ban pynphriang ne ïalap ïa ka niam lajong kaba mut ka hok ban ïakren ïa ka jingleh ngeit jong u briew sha kiwei pat lane ban pynpaw ïa la ka jingngeit. Kane kam mut ban pynkylla ïa u briew sha kawei ka jingngeit da ka bor, thok ne ban pynbeij. Namar katkum ka aiñ bad hapoh ki kyndon jong ka riti synshar ka Ri India, manla u ne ka briew ki long laitluid ïa la ka jingsngew bad laitluid ban ting ïa ka niam da ka jingleh kaba laitluid ha la ka jingmut ne ym don ba lah ban pynbor ïa u ban leh ïa kaei kaei kaba ym dei da ka jingjied la jong,” ong ka ATCCC.
Ka ATCCC ka ong ba kam lah ban sngewthuh ïa ka jingthmu ne jingmut jong u Myntri Rangbah ka jylla Dr. HB Sarma kaba u la pynshai ha khmat ki lad pathai khubor. Lada ka jingthmu kadei na ka bynta ka bha ka miat jong baroh ki nongshong shnong khlem da kheiñ ïa kano kano ka niam bad ka jingpyrshang ban pynduh ïa kaba sniew na ka imlang sahlang bad ban wanrah ïa ka suk ka saiñ bad ka roi ka san, kumta ka jingmut bad ki kyntien hapoh ka Bill dei ban khmihbniah biang na kaba long mynta.
“Namar shisien ba la mynjur ïa ka Bill lane kan long ka aiñ da ki kyntien ki bym ïahab kan lah ban pynshlur ïa ki briew ban pyndonkam da khong pong ïa ka aiñ bad pyndonkam bakla ïa ka, ha kaba khatduh kan long kaba kham sniew shuh shuh na kaba bha. Kumta, ma ngi ha ka kyrteng jong ka ATCCC bad baroh ki Khristan riewlum jong ka Assam ngi kyrpad ïa u Myntri Rangbah ka Assam u Dr. Himanta Biswa Sarma ban pynthikna ïa ka jingshaniah bad ka jingmut jong ka Bill bad ban long pdeng katkum ka Riti Mane laitluid kumba la thoh hapoh ka riti synshar ka Ri India ka Article 25, haba mynjur ïa ka “The Assam Healing (Prevention of Evil) Practices Bill, 2024″ na ka bynta ka bha ka miat jong ka jylla,” ong ka shithi ba la soi da u Rev. Dr. Solomon Rongpi, Enash Kumar Basumatary, Rev.Laban Pegu, Rev. D.C. Haia, President, Vice-President Rev. Sushil Daimari, Rev. Primingson Milick, Rev. Juron Baglari, Rev. Lazarus Deori, Secretary, Asstt. Secretary, Joint Secretary, Joint Secretary.
